ගෝලීය සයිබර් ආරක්ෂණ තර්ජනවල විශාල වර්ධනයක් සලකුණු කරමින්, “zero-day” සයිබර් ප්‍රහාරයක් දියත් කිරීමේ ක්‍රමවේදයක් සකස් කර ගැනීම සඳහා හැකර්වරුන් විසින් කෘත්‍රිම බුද්ධිය (AI) භාවිතා කළ පළමු සිදුවීම තමන් විසින් අනාවරණය කරගෙන ඇති බව ගූගල් සමාගම පවසයි.

එහි තර්ජන බුද්ධි කණ්ඩායම විසින් ප්‍රකාශයට පත් කරන ලද වාර්තාවක දැක්වෙන්නේ, ප්‍රසිද්ධ විවෘත මූලාශ්‍ර වෙබ් පරිපාලන මෙවලමක මෙතෙක් හඳුනා නොගත් මෘදුකාංග දුර්වලතාවයක් ඉලක්ක කර ගනිමින්, අපරාධ හැකර් කණ්ඩායමක් විසින් AI මගින් සංවර්ධනය කරන ලද ප්‍රහාරක ක්‍රමවේදයක් භාවිතා කිරීමට උත්සාහ කර ඇති බවයි.

මෙම ප්‍රහාරක ක්‍රමවේදය සකස් කර තිබුණේ ද්වි-සාධක සත්‍යාපනය (2FA) මඟ හැරීමට වන අතර, එමගින් ප්‍රහාරකයින්ට පද්ධති වෙත අනවසරයෙන් ඇතුළු වීමට ඉඩ කඩ ලැබීමට තිබුණි.

කෙසේ වෙතත්, මෙම ප්‍රහාරය මහා පරිමාණයෙන් දියත් කිරීමට පෙර එය වළක්වා ගැනීමට හැකි වූ බව ගූගල් ආයතනය පවසයි.

ගූගල් ආයතනයට අනුව, මෙම ප්‍රහාරක ක්‍රමවේදය සකස් කිරීමේදී AI සහාය ලබාගෙන ඇති බව හැඟවෙන දර්ශක කිහිපයක්ම විමර්ශකයින් විසින් සොයාගෙන ඇත.

අසාමාන්‍ය කේත හැඩතල ගැන්වීම් (code formatting), පැහැදිලි කිරීමේ සටහන්, සහ AI මගින් නිපදවන ප්‍රතිදානයන්හි බහුලව දක්නට ලැබෙන මනඃකල්පිත දුර්වලතා බරපතලකම පිළිබඳ ලකුණු කිරීම් ද ඊට ඇතුළත් වේ.

මෘදුකාංගයේ දෝෂයක් සොයා ගැනීමට සහ එය ආයුධයක් ලෙස භාවිතා කිරීමට AI ආකෘතියක් උදව් කළ බවට Google ආයතනයට ඉහළ විශ්වාසයක් තිබේ.

කෙසේ වෙතත්, Google ආයතනය සඳහන් කළේ ඔවුන්ගේ Gemini AI පද්ධතිය ඊට සම්බන්ධ වූ බවට සාක්ෂි නොමැති බවයි.

AI මගින් හැකර්වරුන්ට මෘදුකාංග දුර්වලතා හඳුනා ගැනීමට සහ සංකීර්ණ සයිබර් ප්‍රහාර ස්වයංක්‍රීය කිරීමට හැකි වනු ඇතැයි සයිබර් ආරක්ෂක විශේෂඥයෝ අනතුරු අඟවා තිබේ.

Google හි සොයාගැනීම් මෙම බිය සැබෑ වන ආකාරය පිළිබඳ පැහැදිලි උදාහරණයක් ලෙස සැලකේ.

චීනය, රුසියාව සහ උතුරු කොරියාව වැනි රටවල රාජ්‍ය සම්බන්ධතා ඇති සයිබර් ක්‍රියාකාරිකයෝ AI බලයෙන් ක්‍රියාත්මක වන හැකින් මෙවලම් සහ ස්වයංක්‍රීය ප්‍රහාර පද්ධති සොයා බලමින් සිටිති.