සංචාරක වීසා බලපත්‍ර උපයෝගී කරගනිමින් ශ්‍රී ලාංකිකයන් ඩුබායි සහ මෝල්ඩෝවා රාජ්‍යයන්හි රැකියා සඳහා යොමුකළ බව කියන, ‘ඩුබායි සුද්දා’ නමින් හැඳින්වෙන රන්වතීගේ නිශ්ශංක ප්‍රියදර්ශන නැමැත්තා ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරීන් විසින් ඊයේ (1) කඩුවෙල ප්‍රදේශයේදී අත්අඩංගුවට ගෙන තිබේ.

බුලත්සිංහල ප්‍රාදේශීය සභාවේ එක්සත් ජාතික පක්ෂ හිටපු මන්ත්‍රීවරයකු ද වන ‘ඩුබායි සුද්දා’ නැමැති මෙම සැකකරු අත්අඩංගුවට ගෙන ඇත්තේ ගිරිඋල්ල ප්‍රදේශයේ පදිංචිකරුවෙකු විසින් කරන ලද පැමිණිල්ලකට අනුවය.

සැකකරු ඩුබායි හි රැකියා අවස්ථා ලබාදෙන බවට පොරොන්දු වී මුදල් ලබාගෙන, පසුව පොරොන්දු වූ පරිදි රැකියා ලබානුදුන් බවට එම පැමිණිල්ල මඟින් චෝදනා කර තිබිණි.

විමර්ශකයන් සඳහන් කළේ, සැකකරු විසින් ශ්‍රී ලාංකිකයන් රැකියා සඳහා සංචාරක වීසා මඟින් ඩුබායි සහ මෝල්ඩෝවා වෙත යැවීමට කටයුතු කර ඇති බවයි.

විදේශ සේවා නියුක්ති කාර්යාංශයට අනුව, මෑතකදී දිවයිනට පැමිණ ඇති මෙම සැකකරු, ඔහුව අත්අඩංගුවට ගැනීමට පැමිණි නිලධාරීන් මඟහරිමින් තම පෞද්ගලික මෝටර් රථයෙන් පළායෑමට උත්සාහ කිරීමේදී මෙලෙස අත්අඩංගුවට පත්ව ඇත.

සමාජ මාධ්‍ය ජාලා උපයෝගී කරගනිමින් මොහු මෙම ජාවාරම මෙහෙයවා ඇති අතර, සංචාරක වීසා මත ශ්‍රී ලාංකිකයන් රැකියා සඳහා ඩුබායි වෙත යැවීමේ ප්‍රධානතම සාමාජිකයෙකු ලෙස මොහු සැලකෙන බව ද නිලධාරීහු පවසති.

සැකකරු මීට පෙර ද මෙවැනිම වැරදි සම්බන්ධයෙන් අත්අඩංගුවට ගෙන පසුව ඇප මත මුදාහැර සිටි අයෙකි.

සැකකරු අද (2) කුලියාපිටිය මහේස්ත්‍රාත් අධිකරණය හමුවට ඉදිරිපත් කිරීමට නියමිතය.

කාර්යාංශය විසින් නිකුත් කරන ලද වලංගු බලපත්‍රයක් නොමැතිව විදේශ රැකියා සඳහා පුද්ගලයන් බඳවා ගැනීම නීතිවිරෝධී බව ශ්‍රී ලංකා විදේශ සේවා නියුක්ති කාර්යාංශය නැවත වරක් අවධාරණය කරයි.

මෙම ජාවාරමට හසුවී වින්දිතයන් බවට පත්වූවන් සිටී නම්, වහාම කාර්යාංශයේ විශේෂ විමර්ශන අංශයේ 0112 882 229 අංකය අමතන ලෙස මහජනතාවගෙන් ඉල්ලා සිටියි.