අපරාධ පරීක්ෂණ දෙපාර්තමන්තුවේ ජ්‍යෙෂ්ඨ නිලධාරියකු ලෙස පෙනීසිටිමින් තරුණයන් 25 කට අධික පිරිසකගේ මුදල් සහ වටිනා භාණ්ඩ කොල්ල කෑ බවට චෝදනා ලැබූ හිටපු පොලිස් නිලධාරියකු සහ ඔහුගේ සහචරයින් දෙදෙනකු ඊයේ අතුරුගිරිය පොලිසිය විසින් අත්අඩංගුවට ගෙන තිබේ.

කොල්ලකෑම් සිදුකිරීම සඳහා සැකකරුවන් දිවයිනේ විවිධ ප්‍රදේශ හරහා ගමන් කිරීමට භාවිත කළ මෝටර් රථය ද පොලිසිය විසින් අත්අඩංගුවට ගෙන ඇත.

ප්‍රධාන සැකකරු සහ තවත් සහචරයකු සැකපිට සෝදිසි කිරීම් කරන මුවාවෙන් තරුණයන් මංකොල්ලකෑම්වලට ලක්කර ඇති බව විමර්ශනවලින් හෙළිව තිබේ.

අතුරුගිරියේ තරුණයකුගෙන් රුපියල් 210,000 ක් වටිනා රන් මාලයක් කොල්ලකෑම සම්බන්ධයෙන් ලැබුණු පැමිණිල්ලක් මත සිදුකළ විමර්ශනවලින් පසුව ඔවුන් අත්අඩංගුවට ගෙන ඇත. එම ස්ථානයේ තිබූ සීසීටීවී දර්ශනවලින් පොලිසිය සැකකරුවන් හඳුනාගෙන ඇත.

ප්‍රශ්න කිරීම්වලදී, සැකකරුවන් රට පුරා තවත් ප්‍රදේශ කිහිපයකදී මෙවැනිම මංකොල්ලකෑම් සිදුකළ බව පිළිගෙන තිබේ.

වැඩිදුර පරීක්ෂණවලින් හෙළිව ඇත්තේ, ප්‍රධාන සැකකරු ගම්පහ පොලිසියට අනුයුක්තව සේවය කළ 34 හැවිරිදි හිටපු පොලිස් කොස්තාපල්වරයකු බවත්, අනෙක් අය රදාවානේ රියදුරකු සහ ඔබේසේකරපුරේ පදිංචි 37 හැවිරිදි වෙළඳ විධායක නිලධාරියෙකු බවත්, අපරාධ සඳහා භාවිත කළ වාහනය ඔහු සතු බවත්ය.

සැකකරුවන් හෝමාගම මහේස්ත්‍රාත් අධිකරණයට ඉදිරිපත් කර වැඩිදුර ප්‍රශ්න කිරීම සඳහා රඳවා තබාගන්නා බව පොලිසිය පවසයි.