ලංකා ගමනාගමන මණ්ඩලයේ සේවකයන් සහ පෞද්ගලික බස් රථ සේවකයන් අතර පොළොන්නරුව බස් නැවතුම්පොළේ ඇති වූ ගැටුමකින් ඩිපෝ කළමනාකරුවෙක් ඇතුළු පස්දෙනකු තුවාල ලබා රෝහල්ගත කර ඇත.

මාතර සිට පොළොන්නරුව ඩිපෝවට ගමන් කරන ලංගම බස් රථයකින් මගීන් රැගෙන යෑමෙන්, පෞද්ගලික බස් රථවල මගීන් සංඛ්‍යාව අඩුවීම හේතුවෙන් මෙම ගැටුම ඇති වූ බව වාර්තා වේ.

ලංගම බස් රථය මඟින් පෞද්ගලික පන්තිවලට සහභාගී වන සිසුන් සහ වාර ප්‍රවේශපත්‍ර හිමියන් රැගෙන ගොස් ඇති අතර එය පෞද්ගලික බස් රථවල මගීන් සංඛ්‍යාවට අඩුවීමට බලපෑ බව පැවැසේ.

ඩිපෝ කළමනාකරු ද මාතර සිට පැමිණි ලංගම බස් රථයේ සිට ඇත.

පොළොන්නරුව ඩිපෝව ඉදිරිපිට ශ්‍රී ලංගම බස් රථය නැවැත්වීමෙන් පසු පෞද්ගලික බස් රථ රියදුරු විසින් ඩිපෝ කළමනාකරුට පහර දී ඇති අතර, ඒ අවස්ථාවේ ඩිපෝවේ සිටි සේවකයන් පිරිසක් පෞද්ගලික බස් රථ රියදුරුට සහ කොන්දොස්තරට පහරදීමෙන් එම තත්වය උත්සන්න වූ බව පොලිසිය පවසයි.

එම ගැටුමෙන් ලංගම සේවකයන් තිදෙනකු සහ පෞද්ගලික බස් රථ සේවකයන් දෙදෙනකු තුවාල ලබා ඇති බව වාර්තා වී ඇත.

පොළොන්නරුව දිස්ත්‍රික්කයේ දුර ගමන් සේවා ඇතුළුව බස් රථ 135 කට ආසන්න සංඛ්‍යාවක් ධාවනය වන බවත්, එම ප්‍රහාරයට විරෝධය පළකරමින් අද (26) දින බස් රථ වර්ජනයක් පවත්වන බවත් ඩිපෝ නිලධාරියකු පැවැසීය.

පොළොන්නරුව ඩිපෝවේ බස්රථ කිහිපයක් නවතා ඇති අතර, සේවකයන්ගේ, බස්රථවල සහ දේපළවල ආරක්ෂාව සහතික කිරීම සඳහා පොලිසිය විසින් ප්‍රධාන ගේට්ටුව වසාදමා ඇත.

පොළොන්නරුව පොලිස් ස්ථානයේ නිලධාරීන් ආරක්ෂාව සඳහා යොදවා ඇති අතර, පොළොන්නරුව ජ්‍යෙෂ්ඨ පොලිස් අධිකාරීවරයාගේ උපදෙස් පරිදි වැඩිදුර පරීක්ෂණ සිදුවෙමින් පවතී.