September 23, 2025
එක්ස්ප්රස් පර්ල් සමුද්ර ව්යසනය සඳහා අමෙරිකානු ඩොලර් බිලියන 1ක වන්දියක් ගෙවීමට ශ්රේෂ්ඨාධිකරණය දුන් නියෝගයට අනුකූල වීම සිංගප්පූරු නැව් සමාගමක් වන එක්ස්-ප්රස් ෆීඩර්ස් ප්රතික්ෂේප කිරීම සම්බන්ධයෙන් ශ්රී ලංකාවේ එක්සත් ජාතීන්ගේ කාර්යාලය කණස්සල්ල පළ කර තිබේ.
X සමාජ මාධ්ය වේදිකාවේ පළ කරන ලද නිවේදනයක, එක්සත් ජාතීන්ගේ කාර්යාලය පැවසුවේ සමාගම තීන්දුවට ගරු කිරීම ප්රතික්ෂේප කිරීම ‘ඇත්තෙන්ම කණස්සල්ලට කරුණක්’ බවයි.
“මිනිසුන්ට, වෙරළ තීරයන්ට සහ සමුද්ර ජීවීන්ට සිදු වූ හානිවල පරිමාණය සමාලෝචනය කරන ලෙසත්, ප්රජාවන්ට සහ පරිසර පද්ධතියට යුක්තිය තහවුරු කරන ලෙසත් අපි නැව් සමාගමෙන් ඉල්ලා සිටිමු,” යනුවෙන් එහි තවදුරටත් සඳහන් විය.
එක්සත් ජාතීන්ගේ මෙම ප්රකාශය පැමිණෙන්නේ එක්ස්-ප්රස් ෆීඩර්ස් ප්රධාන විධායක ෂ්මුවෙල් යොස්කොවිට්ස් විසින් කරන ලද අදහස්වලට ප්රතිචාර වශයෙනි.
ඔහු AFP වෙත පැවසුවේ තීන්දුවට අනුකූල වීම ගෝලීය නැව්ගත කිරීම සඳහා දුරදිග යන ප්රතිවිපාක ඇති කරන බවත් ‘භයානක පූර්වාදර්ශයක්’ සකසන බවත්ය.
“අපි ගෙවන්නේ නැහැ, මොකද සමුද්ර වෙළඳාමේ සමස්ත පදනමම වගකීම් සීමා කිරීම මත පදනම් වී ඇති නිසා. මෙම තීන්දුව වගකීම් සීමා කිරීම අඩපණ කරනවා.” දඬුවමේ ‘විවෘත ස්වභාවය’ ප්රතික්ෂේප කරමින් යොස්කොවිට්ස් තර්ක කළේය.
සිංගප්පූරු ධජය සහිත එක්ස්-ප්රස් පර්ල් නෞකාව 2021 මැයි මාසයේදී ශ්රී ලංකාවේ බටහිර වෙරළට ඔබ්බෙන් ගිනිගෙන ගිලී ගිය අතර, එය රටේ දරුණුතම සමුද්ර දූෂණ ව්යසනයක් ඇති කළේය.
