හික්කඩුව දුම්රිය ස්ථානයේ නවතා තිබූ ‘නයනා කුමාරි’ නම් දුම්රියෙන් රුපියල් කෝටියකට අධික විදුලි රැහැන් සොරකම් කර තිබේ.

දුම්රිය ආරක්ෂක බළකාය භාර නියෝජ්‍ය අධිකාරී ජී.ඩබ්ලිව්. සුමිත් පවසන්නේ බ්‍රහස්පතින්දා අලුයම මෙම කොල්ලකෑම සිදුව ඇති බවයි.

නයනා කුමාරි ශීඝ්‍රගාමී දුම්රිය හික්කඩුව දුම්රිය ස්ථානයේ නවතා තිබී ඇත්තේ කොළඹ සිට ඊට පෙර දින රාත්‍රියේ පැමිණි පසුය.

දුම්රිය ආරක්ෂක නිලධාරීන්ට අනුව, අදාළ සොරුන් විශේෂයෙන් ඉලක්ක කර ඇත්තේ මගී මැදිරි තුළ ආලෝක පද්ධතිය බල ගැන්වීම සඳහා භාවිත කරන කේබල්ය.

ඔවුන් ක්‍රියාකර ඇති ආකාරය අනුව විදුලි පරිපථ පිළිබඳ සංකීර්ණ අවබෝධයක් තිබී ඇති බවට සැක පළවී තිබේ.

එම කේබල් නිසි පරිදි ඉවත්කර ගැනීමට හැකියාව ඇත්තේ එවැනි තාක්ෂණයක් ගැන හුරුපුරුදු පුද්ගලයන්ට පමණක් වීම ඊට හේතුවයි.

ගාල්ල පොලිසියේ අපරාධ විමර්ශන අංශයේ ස්ථානාධිපති A.S.L. නාරංගොඩ පවසන්නේ මේ සම්බන්ධයෙන් පුළුල් පරීක්ෂණයක් ආරම්භ කර ඇති බවයි.