March 2, 2025
මේ වසරේ ජුනි මාසය දක්වා රට තුළ පවතින වියළි කාලගුණය සහ විදුලි උත්පාදනය සඳහා ඉන්ධන භාවිත කරන ප්‍රමාණය අනුව මීළඟ විදුලි ගාස්තු සංශෝධනය තීරණය වනු ඇතැයි ලංකා විදුලිබල මණ්ඩලය පවසයි.
පවතින වියළි කාලගුණික තත්ත්වය හේතුවෙන් විදුලිබල උත්පාදනයට ඇති වන බලපෑම හේතුවෙන් ඉදිරි මාස කිහිපය තුළ ශ්‍රී ලංකාවේ විදුලි ගාස්තු ඉහළ යා හැකි බවට බලශක්ති අමාත්‍ය කුමාර ජයකොඩි කළ ප්‍රකාශයකට ප්‍රතිචාර දක්වමින් එම මණ්ඩලයේ මාධ්‍ය ප්‍රකාශක ඉංජිනේරු ධම්මික විමලරත්න කියාසිටියේ දැනට රට තුළ පවතින රෙගුලාසිවලට අනුව සෑම මාස හයකට වරක් ගාස්තු සංශෝධනයක් අවශ්‍ය බවයි.
මෙම ගැලපීම් හේතුවෙන් ගාස්තු වැඩිවීමක්, අඩුවීමක් හෝ වෙනසක් සිදුවිය හැකි බව පෙන්වාදෙන ඔහු, වැඩිදුරටත් පවසන්නේ, ලංකා විදුලිබල මණ්ඩලයේ නිර්දේශ මත පදනම්ව ශ්‍රී ලංකා මහජන උපයෝගිතා කොමිෂන් සභාව ඒ පිළිබඳ තීරණය කරනු ඇති බවයි.
දීර්ඝ නියං තත්ත්වය හේතුවෙන් විදුලිය උත්පාදන පිරිවැය ඉහළ යන බවත්, එමගින් ගාස්තු සංශෝධනයක් සිදුවිය හැකි බවටත් ඔහු අනතුරු අඟවා තිබේ.
කෙසේවෙතත් ඉංජිනේරු ධම්මික විමලරත්න ප්‍රකාශ කරන්නේ, මාස හයකින් සිදුකෙරෙන මීළඟ සංශෝධනයේදී කිසියම් ගාස්තු වෙනසක් තීරණය කිරීමට පෙර, පසුගිය මාස හයක කාලය තුළ සියලු වියදම් සමාලෝචනය කිරීමට ද ලංකා විදුලිබල මණ්ඩලය කටයුතු කරන බවයි.
“වර්තමාන තත්ත්වය දැඩියි. විශේෂයෙන් පවතින නියඟය සමඟ. නමුත් වර්ෂාපතනය අප්‍රේල් අග හෝ මැයි මුලදී අපේක්ෂා කරන්න පුලුවන්. නියඟ කාලවලදී, අපි දැනට මෙගාවොට් 900 ක් නිපදවන ගල් අඟුරු බලාගාරය වැනි තාප බලාගාර මත වැඩි වශයෙන් විශ්වාසය තබා සිටිනවා. විශේෂයෙන් සූර්ය බලශක්තිය. සූර්ය බලශක්තිය දිවා කාලයේදී උපකාරී වෙනවා. නමුත් අපට ගබඩා යටිතල පහසුකම් නැහැනේ. ඒක නිසා රාත්‍රී කාලයේ බලය ප්‍රධාන වශයෙන් තාප බලාගාර වලින් තමයි ලැබෙන්නේ ”ඔහු පවසයි.
වර්ෂාව ලැබෙනතුරු විදුලි නිෂ්පාදන පිරිවැය ඉහළ යෑමට ඉඩ ඇති බව ද ඔහු පෙන්වා දී තිබේ.
“ඉදිරි මාස කිහිපය තුළ අධික වර්ෂාවක් ඇති වුවහොත් තත්ත්වය යහපත් අතට හැරෙන්න පුලුවන්. කෙසේවෙතත්, මෝසම් වැසි මැයි මාසයේදී අපේක්ෂා කරනවා, නිෂ්පාදන පිරිවැය එතෙක් ඉහළ මට්ටමක පවතියි. අපි පිරිවැය-ප්‍රතිසාධන තීරුබදු ක්‍රමයක් අනුගමනය කරන නිසා, මෙම ඉහළ පිරිවැය ගාස්තු ඉහළ දැමීමෙන් ආවරණය කිරීමට අවශ්‍ය වෙනවා. මහජන උපයෝගිතා කොමිෂන් සභාව මාස හයකට පසු අවසන් තීරණය ගනියි. නමුත් සැලකිය යුතු වර්ෂාපතනයක් නොමැතිව විදුලි නිෂ්පාදන පිරිවැය අඛණ්ඩව ඉහළ යන්න පුලුවන්” ඔහු වැඩිදුරටත් පෙන්වාදුන්නේය.
