පසුගිය වසරේ ඔක්තෝම්බර් මාසයේදී වැඩිකරන ලද විදුලි බිල අඩුකිරීම සඳහා විදුලිබල මණ්ඩලය හෙට දිනයේදී යෝජනාවක් ඉදිරිපත් කිරීමට බලාපොරොත්තු වන බව විදුලිබල හා බලශක්ති ඇමැති කංචන විජේසේකර අද පාර්ලිමේන්තුවට දැනුම් දුන්නේය.

මෙම යෝජනාව හෙට (22) මහජන උපයෝගිතා කොමිෂන් සභාවට ඉදිරිපත් කිරීමට සූදානම් වෙමින් පවතින බව සභා ගර්භය අමතමින් ඇමැතිවරයා පැවසීය.

ඔක්තෝබර් මාසයේදී යෝජිත විදුලි ගාස්තු වැඩිකිරීම සම්පූර්ණයෙන්ම අත්හිටුවා උපරිම සහනයක් ලබාදීමට ලංවිම බලාපොරොත්තු වන බවද ඔහු වැඩිදුරටත් සඳහන් කළේය.

පසුගිය වසරේ යෝජනා කරන ලද පහත සඳහන් සංශෝධන සහනය ලබාදීමට හෝ අවම වශයෙන් ඉවත් කිරීමට ලංවිම කටයුතු කරමින් සිටින බවද ඇමැතිවරයා වැඩිදුරටත් පැවසීය.

ඒ අනුව, ගෘහස්ථ සහ ආගමික සිද්ධස්ථාන සඳහා සියයට 18ක්, කර්මාන්ත සහ හෝටල් සඳහා සියයට 12ක් සහ රජයේ ආයතන සඳහා සියයට 24ක් වශයෙන් ගාස්තු අඩුකෙරෙනු ඇත.