October 1, 2025
කාන්තාවන් වඳභාවයට පත් කළ බවට 2019 දී බොරු චෝදනා එල්ල වූ වෛද්‍ය ෂියාබ්දීන් මොහොමඩ් ෂාෆිගේ දියණියගේ කතාව පවසන ‘රන් දෝණි’ කෘතිය ඊයේ (30) කොළඹ අන්තර්ජාතික පොත් ප්‍රදර්ශනයේදී එළිදැක්විණි.
ප්‍රවීණ මාධ්‍යවේදී සුරංග සේනානායක විසින් රචිත මෙම පොත, අදාළ දුෂ්කර කාලය තුළ සහ ඉන්පසුව වෛද්‍ය ෂාෆිගේ පවුල මුහුණ දුන් අභියෝග විස්තර කරයි.
පොත් ප්‍රදර්ශනයේ එළිමහන් රඟහලේදී පැවති මෙම උත්සවයේ ප්‍රධාන ආරාධිතයා ලෙස සෞඛ්‍ය හා මාධ්‍ය අමාත්‍ය වෛද්‍ය නලින්ද ජයතිස්ස සහභාගී විය.
ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා, ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක, මහරාජා කැපිටල් සමූහයේ සභාපති ශෂි රාජ් මහේන්ද්‍රන්, සමූහ අධ්‍යක්ෂ ෂෙවාන් ඩැනියෙල්, එම්ඩී ගුණසේන කළමනාකාර අධ්‍යක්ෂ රජීව් ගුණසේන, ප්‍රකාශන කළමනාකරු ජයම්පති රාජකරුණා සහ විශ්‍රාමික ජ්‍යෙෂ්ඨ පොලිස් අධිකාරී ශානි අබේසේකර ඇතුළු ප්‍රමුඛ පෙළේ පුද්ගලයන් කිහිප දෙනෙක් ද ඊට සහභාගී වූහ.
කැපී පෙනෙන ප්‍රේක්ෂක පිරිසක් ආකර්ෂණය කරගත් මෙම එළිදැක්වීමට වෛද්‍ය ෂාෆි, ඔහුගේ බිරිඳ සහ දියණිය ද සහභාගී වූහ.
