August 28, 2025
දත් සැබෑ ලෙසම සුදු නොවන බැවින් ඒවා සුදු කිරීම සඳහා වයිට්නින් දන්තාලේප භාවිතය නතර කරන ලෙස සෞඛ්‍ය අමාත්‍යාංශය ජනතාවට උපදෙස් දෙයි.
මේ සම්බන්ධයෙන් අදහස් දක්වමින් ප්‍රජා දන්ත වෛද්‍ය උපදේශක වෛද්‍ය ශානිකා මුතුතන්ත්‍රි පවසන්නේ, වෙළඳපොළේ ඇති සුදු කිරීමේ දන්තාලේප හානිකර නොවන නමුත් ඒවායේ සිලිකා හෝ කැල්සියම් කාබනේට් වැනි රළු ද්‍රව්‍ය අඩංගු බවයි.
මේවා භාවිතයෙන් දත්වල ඇති මතුපිට පැල්ලම් පමණක් පිරිසිදු කරන නමුත් දත්වල එනමලය සීරීමට ලක්විය හැකි බව ඇය පවසයි.
එවැනි දන්තාලේපවලින් දත් සුදු කිරීමේ බලපෑම දිගු කලක් නොපවතින බව පැහැදිලි කරන ඇය, දත් ආරක්ෂා කිරීමට උපකාරී වන ෆ්ලෝරයිඩ් අඩංගු දන්තාලේප භාවිතා කරන ලෙස මහජනතාවට උපදෙස් දෙයි.
වර්තමානයේ පෙර පාසල් දරුවන්ගෙන් 63% ක් සහ වයස අවුරුදු 35 ත් 44 ත් අතර වැඩිහිටියන්ගෙන් 90% ක් තුළ දත් දිරායෑමේ තත්වය දක්නට ලැබෙන බව ද වෛද්‍යවරිය පෙන්වාදෙයි.
ෆ්ලෝරයිඩ් දන්තාලේප දත් දිරායෑම වැළැක්වීමට හොඳම ක්‍රමය අවධාරණය කරන ඇය පෙන්වාදෙන්නේ, එය එනමලය ශක්තිමත් කරමින් දත් මුල් සඳහා සිදුවන හානි වළක්වා සහ මුඛයේ ආම්ලිකතාව අඩු කරන බවයි.
