2022 වසරේ ශ්‍රී ලංකාවේ බන්ධනාගාර රෝහල්වලට අනුයුක්ත කරන ලද වෛද්‍යවරුන් සෞඛ්‍ය අමාත්‍යාංශය විසින් නියම කර ඇති පැය ගණනට වඩා සැලකිය යුතු තරම් අඩු පැය ගණනක් සේවය කරමින් තම රාජකාරිය පැහැර හැර ඇති බව අනාවරණය වී තිබේ.

විගණකාධිපතිවරයාගේ 2022 වාර්ෂික වාර්තාව මේ බව අනාවරණය කරයි.

සෞඛ්‍ය අමාත්‍යාංශයේ ලේකම්වරයාගේ චක්‍රලේඛයකට අනුව බන්ධනාගාර රෝහල්වල වෛද්‍යවරුන් සතියේ දිනවල දිනකට අවම වශයෙන් පැය 06ක් සහ සෙනසුරාදා පැය 04ක් සේවය කළ යුතුය.

කෙසේවෙතත්, වාර්තාව පෙන්වාදෙන්නේ, බන්ධනාගාර රෝහල්වලට අනුයුක්තව සේවය කරන වෛද්‍යවරුන් 33 දෙනා මසකට මුළු මිනිස් පැය 1,296 ක් පමණක් වැඩකර ඇති අතර, එය නියමිත මිනිස් පැය 4,570ට වඩා බෙහෙවින් අඩු බවයි.

මෙම බරපතල නොසැලකිල්ල පිටුපස ඇති හේතු සොයාගැනීමටත්, සේවා කාලය උල්ලංඝනය කිරීමට වගකිව යුතු පුද්ගලයින්ට එරෙහිව නිසි පියවර ගැනීමටත් සෞඛ්‍ය අමාත්‍යාංශය මේ පිළිබඳව සොයා බලන බව වාර්තා සඳහන් කරයි.