October 9, 2026
වාහන හිමිකාරිත්වය පැවරීමේ නිසි ක්‍රියාපටිපාටිය අනුගමනය කරන ලෙස වාහන හිමිකරුවන්ගෙන් ඉල්ලා සිටින මෝටර් රථ ප්‍රවාහන දෙපාර්තමේන්තුව, ‘විවෘත ලේඛන’ මගින් වාහන විකිණීමෙන් වළකින ලෙස මහජනතාවට උපදෙස් දී තිබේ.
මෝටර් රථ ප්‍රවාහන කොමසාරිස් ජනරාල්, විශ්‍රාමික එයාර් වයිස් මාර්ෂල් තුෂාර ඉන්දුනිල් ප්‍රනාන්දු පැවසුවේ, වාහනයක අයිතිය පවරන්නා සහ එය ලබාගන්නා පාර්ශ්වය යන දෙදෙනාම MTA 6 පත්‍රිකාවට අත්සන් තබා එහි අදාළ පිටපත මෝටර් රථ ප්‍රවාහන දෙපාර්තමේන්තුව වෙත භාර දිය යුතු බවයි.
මෝටර් රථ භාවිතයෙන් සිදු කෙරෙන විවිධ නීතිවිරෝධී ක්‍රියා වැළැක්වීම සහ වංචනික ක්‍රියාවලින් මහජනතාව ආරක්ෂා කිරීම මෙම පියවරේ අරමුණ බව ද ඔහු පැහැදිලි කළේය.
නීතිවිරෝධී ක්‍රියා සඳහා වාහන අනිසි ලෙස භාවිත කිරීම වැළැක්වීම සඳහා නිල වාහන හිමිකාරිත්වය පැවරීමේ ක්‍රියාවලිය අනුගමනය කිරීමේ වැදගත්කම ද එම දෙපාර්තමේන්තුව විසින් අවධාරණය කර තිබේ.
