ඉන්ධන බෙදා හැරීමේ කාර්යක්ෂමතාව, විනිවිදභාවය සහ වගවීම වැඩිදියුණු කිරීම අරමුණු කරමින් සියලුම රජයේ වාහන සඳහා ලංකා ඛනිජ තෙල් නීතිගත සංස්ථාව (CPC) නව ඩිජිටල් ඉන්ධන කාඩ්පත් පද්ධතියක් හඳුන්වා දී ඇති බව ඩිජිටල් ආර්ථික අමාත්‍යාංශය පවසයි.

නව ක්‍රමය යටතේ, රජය සතු වාහන සඳහා විශේෂ ඩිජිටල් ඉන්ධන කාඩ්පතක් නිකුත් කරනු ලබන අතර එමඟින් රට පුරා ඕනෑම ඉන්ධන පිරවුම්හලකින් ඉන්ධන ලබාගැනීමට ඉඩ සැලසේ.

ඉන්ධන නාස්තිය, වංචා සහ අක්‍රමිකතා අවම කිරීමට සහ පවතින ලියකියවිලි ක්‍රියාවලි හේතුවෙන් සිදුවන ප්‍රමාදයන් අවම කිරීමට මෙම වැඩසටහන මගින් උත්සාහ කරන බව අමාත්‍යාංශය නිවේදනයක් නිකුත් කරමින් කියා සිටියේය.

මෙම පද්ධතිය මඟින් රජයේ ආයතනවල ඉන්ධන භාවිතය නිවැරදිව නිරීක්ෂණය කිරීමට සහ වාර්තා කිරීමට ද හැකියාව ලැබෙනු ඇති බව නිවේදනයේ වැඩිදුරටත් සඳහන් වේ.

ඉන්ධන බෙදා හැරීම ඩිජිටල්කරණය කිරීම රාජ්‍ය සම්පත් කළමනාකරණය වැඩිදියුණු කිරීමට, ඉන්ධන පාඩු අඩු කිරීමට සහ ජාතික ආර්ථිකය ශක්තිමත් කිරීමට දායක වීමට අපේක්ෂා කරන බව ඛනිජ තෙල් නීතිගත සංස්ථාව පැවසීය.