හෙරොයින් සහ ගංජා ඇතුළු මත්ද්‍රව්‍ය ළඟ තබා ගැනීමේ චෝදනා මත දෙහිවල පොලිස් ස්ථානයට අනුයුක්තව සේවය කළ උප පොලිස් පරීක්ෂකවරයකු අත්අඩංගුවට ගත් බව පොලීසිය පවසයි.

අදාළ පොලිස් නිලධාරියා ළඟ තිබී හෙරොයින්, ගංජා මෙන්ම විදේශීය නිෂ්පාදිත සිගරට් ද සොයාගත් බව පොලිස් මාධ්‍ය ප්‍රකාශක, සහකාර පොලිස් අධිකාරී එෆ්. යූ. වූට්ලර් ප්‍රකාශ කළේය.

මූලික පරීක්ෂණවලදී අනාවරණය වී ඇත්තේ 26 හැවිරිදි වියේ පසුවන මෙම පොලිස් නිලධාරියා මත්ද්‍රව්‍ය භාවිතයට තදින්ම ඇබ්බැහි වූවෙකු බවයි.

අත්අඩංගුවට ගත් සැකකාර උප පොලිස් පරීක්ෂකවරයා ගල්කිස්ස මහෙස්ත්‍රාත් අධිකරණය හමුවට ඉදිරිපත් කිරීමට නියමිතව තිබේ.