අකුරේගොඩ ද්විත්ව ඝාතනය සම්බන්ධයෙන් අත්අඩංගුවට ගත් සැකකරුවන් මෙම අපරාධයෙන් පසු ඔවුන්ගේ ජංගම දුරකථනවල දත්ත මකා දමා ඇති බව පොලිසිය පවසයි.

අකුරේගොඩ දී නීතිඥවරයකුට සහ ඔහුගේ බිරිඳට වෙඩි තබා ඝාතනය කිරීමේ සිද්ධිය සම්බන්ධයෙන් අත්අඩංගුවට ගත් සැකකරුවන් තිදෙනා අද (18) කඩුවෙල මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.

පසුගිය සිකුරාදා (13) අකුරේගොඩ තලංගම ප්‍රදේශයේදී ඔවුන් දෙදෙනා වෙඩි තබා ඝාතනය කර තිබිණි.

සිද්ධියෙන් පසු, පරීක්ෂණ පැවැත්වීම සඳහා පොලිස්පතිවරයාගේ උපදෙස් මත පොලිස් කණ්ඩායම් 12ක් පත් කරන ලදී.

විමර්ශන අතරතුර, ඝාතනයට භාවිත කළ ගිනි අවි ප්‍රවාහනය කළ බවට චෝදනා කරමින් බස්නාහිර පළාත් දකුණු අපරාධ අංශයේ නිලධාරීන් සඳුදා (16) කොට්ටාව ප්‍රදේශයේදී සහෝදරයන් දෙදෙනෙකු අත්අඩංගුවට ගනු ලැබිණි.

ඔවුන් ඊයේ (17) කඩුවෙල මහේස්ත්‍රාත් අධිකරණයට ඉදිරිපත් කරන ලදී.

සැකකරුවන් අද දක්වා ප්‍රශ්න කිරීම සඳහා රඳවා තබා ගැනීමට එහිදී අධිකරණය පොලිසියට අවසර ලබා දුන්නේය.

මේ අතර, ප්‍රශ්න කිරීම්වලදී හෙළි වූ තොරතුරු මත, ඊයේ දහවල් පොල්ගස්ඕවිට ප්‍රදේශයේ ‘ඩිලා’ නමින් හැඳින්වෙන සැකකරුවකු පොලිසිය විසින් අත්අඩංගුවට ගන්නා ලදී.

පොලිසියට අනුව, මෙහෙයුමට සම්බන්ධ වූ බවට චෝදනා එල්ල වන ‘ඩිලා’ගේ උපදෙස් මත සහෝදරයන් දෙදෙනා විසින් ගිනි අවි ප්‍රවාහනය කර ඇති බව විමර්ශනවලින් අනාවරණය වී තිබේ.