June 23, 2024
ඩැනී පෙරේරා නම් ශ්‍රී ලාංකිකයකු 2022 වසරේදී ආරම්භ කළ ‘ඩච් රූල්ස්‘ සමාගම මේ වනවිට ඕස්ට්‍රේලියාවේ මහත් ජනප්‍රියතාවක් හිමිකර ගැනීමට සමත්වී ඇත.
ඩච් රුල්ස්’ ලේබලය යටතේ 2023 වසරේදී වෙළෙඳපොළට පැමිණි ‘නිව් වර්ල්ඩ් ඩ්‍රයි ජින් පානයට මාස කීපයකට පසුව ඕස්ට්‍රේලියානු ඩිස්ටිල්ඩ් ස්පිරිට්ස් සම්මාන උළෙලේදී රිදී සම්මානය දිනාගැනීමට හැකියාව ලැබී ඇති බවත් එරට මාධ්‍ය වාර්තා කළේය.
‘ඩච් රූල්ස්’ සමාගමේ නිර්මාතෘ ඩැනී පෙරේරා අනුරාධපුර නගරයේ ඉපිද හැදී වැඩී ඇති බවත් 2000 දශකය මැදභාගයේදී ඔහු වික්ටෝරියා විශ්ව විද්‍යාලයේ ක්ෂුද්‍ර ජීව විද්‍යාව හැදෑරීමේ බලාපොරොත්තුවෙන් ඕස්ට්‍රේලියාවට පැමිණ ඇති බවත් එරට ජනමාධ්‍ය සඳහන් කරයි.
ඉගෙන ගන්නා කාලය තුළ වියදමට මුදල් සොයාගැනීම සඳහා සොයාගත් අර්ධකාලීන රැකියාව සියල්ල වෙනස් කර ඇති බවද පැවැසේ.
නගරයේ තැබෑරුමක කළ රැකියාවට තමන් බෙහෙවින් ප්‍රියකළ බවත් තමාගේ ජානවල තිබෙන්නේ කුමක්දැයි හඳුනාගැනීම සඳහා එම රැකියාව හේතූවූ බවත් ඩැනී පෙරේරා ප්‍රකාශ කර ඇත.
තැබෑරුම තුළදී මිනිසුන් සමඟ කතාකිරීම සහ ඔවුන්ට මද්‍යසාර පිළිගැන්වීම තමාට බෙහෙවින් ප්‍රියවූ බවත්, තමන් ඉදිරියට යා යුත්තේ ක්ෂුද්‍ර ජීව විද්‍යා අංශයෙන් නොවන බව අවබෝධවූ බවත් පෙරේරා පවසා ඇත.
ඕස්ට්‍රේලියානු ඩිස්ටිල්ඩ් ස්පිරිට්ස් සම්මාන උළෙලේදී නිව් වර්ල්ඩ් කන්ටෙම්පරරි ජින් කාණ්ඩය යටතේ ඩැනී පෙරේරාගේ ‘නිව් වර්ල්ඩ් ඩ්‍රයි ජින්’ පානය රිදී පදක්කම දිනාගෙන ඇත.
ශ්‍රී ලාංකික කුළුබඩු ඇතුළුව අමුද්‍රව්‍ය 15 ක් යොදාගනිමින් මෙම ජින් පානය නිපදවෙන බව ඕස්ට්‍රේලියානු ජනමාධ්‍ය ප්‍රකාශ කර තිබේ.
