ඉරානය විසින් තෙල් නැව් දෙකක් පුපුරුවා හැර අකර්මණ්‍ය කර ඇති බව ප්‍රකාශ කිරීමත් සමඟ හෝර්මුස් සමුද්‍ර සන්ධියේ නාවික ගමනාගමනය පිළිබඳ දැඩි කනස්සල්ලක් මතු වී තිබේ. ඒ අනුව, අඛණ්ඩව නවවැනි දිනටත් ඇමරිකානු බලකායන් ඉරානය වෙත ප්‍රහාර එල්ල කර ඇත.

මෙම ගැටුම් හේතුවෙන් ලෝක වෙළෙඳපොළේ බොරතෙල් මිල සියයට 2කින් ඉහළ ගොස් ඇති අතර, බොරතෙල් බැරලයක මිල ඇමරිකානු ඩොලර් 90 සීමාව ඉක්මවා ගොස් තිබේ.

ඉරාන ඉස්ලාමීය විප්ලවීය ආරක්ෂක බළකාය ප්‍රකාශ කළේ තමන් ජෝර්දානයේ අකාබා ගුවන් තොටුපළේ ඇති ඇමරිකානු ගුවන් යානාවලට බැලස්ටික් මිසයිල ප්‍රහාර එල්ල කළ බවයි. මීට අමතරව කුවේටයේ අල්-අදිරි කඳවුර, අලි අල් සලෙම් ගුවන් කඳවුර සහ සිරියාවේ පිහිටි ඇමරිකානු මිලිටරි කඳවුරු ඉලක්ක කර ප්‍රහාර එල්ල කළ බවද ඔවුහු සඳහන් කළහ. මේ අතර බහරේනයේ අනතුරු ඇඟවීමේ සිරස් නාද වී ඇති අතර, ඉරාන ප්‍රහාරක ඩ්‍රෝන යානා ව්‍යර්ථ කිරීමට කුවේට් හමුදාව පියවර ගෙන තිබේ.

ඇමරිකානු මධ්‍යම අණදෙන කාර්යාලය ප්‍රකාශ කළේ හෝර්මුස් සමුද්‍ර සන්ධියේ වාණිජ නැව්වලට ප්‍රහාර එල්ල කිරීමට ඉරානයට ඇති හැකියාව අඩපණ කිරීම සඳහා තමන් ‘නව ප්‍රහාරක රැල්ලක්’ ආරම්භ කර ඇති බවයි. ඉරානයේ තස්නිම් පුවත් ඒජන්සිය වාර්තා කළේ තබ්‍රිස්, චබහාර්, කොනරක් ඇතුළු ඉරාන නගර කිහිපයකට ඇමරිකානු මිසයිල පතිත වී ඇති බවයි. ඇමරිකානු රාජ්‍ය ලේකම් මාර්කෝ රූබියෝ අවධාරණය කළේ ඉරානය අන්තර්ජාතික මුහුදු මාර්ග පාලනය කිරීමට උත්සාහ කරන තාක් ඇමරිකාව ඊට ප්‍රතිචාර දක්වන බවයි.

පසුගිය පෙබරවාරි 28 වැනිදා ඇමරිකාව සහ ඊශ්‍රායලය එක්ව ඉරානයේ න්‍යෂ්ටික සහ මිසයිල වැඩසටහන් අඩපණ කිරීම අරමුණු කරගනිමින් ආරම්භ කළ මෙම යුද්ධය හේතුවෙන් මේ වන විට ඉරානයේ සහ ලෙබනනයේ දහස් ගණනක් ජීවිතක්ෂයට පත්ව ඇත. සති අන්තයේ සිදුවූ මරණ ද සමඟින් මේ දක්වා මියගිය සමස්ත ඇමරිකානු හමුදා නිලධාරීන් සංඛ්‍යාව 17ක් දක්වා ඉහළ ගොස් ඇති අතර 420කට වැඩි පිරිසක් තුවාල ලබා තිබේ. සැපයුම් මාර්ග අවහිර වීම හේතුවෙන් ගෝලීය උද්ධමනයක් ඇතිවීමේ අවදානමක් ද මේ වන විට මතුව ඇත.