කුප්‍රකට පාතාල නායක නදුන් චින්තක වික්‍රමරත්න නොහොත් හරක් කටා ඇතුළු විත්තිකරුවන් තිදෙනකුට එරෙහිව ගොනුකර ඇති නඩුවේදී විත්තිකරු විසින් මතුකරන ලද මූලික විරෝධතාව කොළඹ මහාධිකරණය විසින් ප්‍රතික්ෂේප කර ඇත.

රඳවා තබාගනිමින් සිටියදී අපරාධ පරීක්ෂණ දෙපාර්තමේන්තුවේ භාරයෙන් පැනයාමට කුමන්ත්‍රණය කිරීම සම්බන්ධයෙන් විත්තිකරුවන්ට එම චෝදනා එල්ල වී තිබේ.

නීතිපතිවරයා විසින් ගොනුකරන ලද අධිචෝදනා පත්‍රය වලංගු බවත්, ත්‍රස්තවාදය වැළැක්වීමේ පනත යටතේ එය පවත්වාගෙන යා හැකි බවත් පවසමින් මහාධිකරණ විනිසුරු සුජීව නිශ්ශංක තීන්දුව ලබා දී ඇත.

අධිචෝදනා පත්‍ර ගොනුකිරීමේදී කිසිදු ක්‍රියාපටිපාටිමය දෝෂයක් නොමැති බව අධිකරණය තීරණය කළ අතර, එම චෝදනා මහාධිකරණයේ අධිකරණ බලයට අයත් බව තහවුරු කර තිබේ.

ඒ අනුව, නඩු විභාගය එළඹෙන අගෝස්තු 5 වැනි දින විභාගයට ගැනීමට විනිසුරුවරයා නියෝග කර ඇත.