දිත්ව සුළි කුණාටු ව්‍යසනයෙන් ඇති වූ බලපෑම නිසි ලෙස කළමනාකරණය නොකළහොත් 2026 අප්‍රේල් වන විට ශ්‍රී ලංකාව විශාල ආර්ථික අර්බුදයකට මුහුණ දිය හැකි බවට එක්සත් ජාතික පක්ෂයේ නියෝජ්‍ය මහලේකම් හරින් ප්‍රනාන්දු අනතුරු ඇඟවීය.

සුළි කුණාටුවෙන් සිදු වූ ආර්ථික හානිය දරුණු බවත්, අර්බුදයට මුහුණ දීම සඳහා රජයට සහ ජනාධිපතිවරයාට පැහැදිලි සැලැස්මක් නොමැති බවටත් මාධ්‍ය හමුවක් අමතමින් හිටපු අමාත්‍යවරයා චෝදනා කළේය.

කෘෂිකර්මාන්තයේ සහ ආහාර අංශයේ පාඩු හේතුවෙන් ඩොලර් සඳහා ඇති ඉල්ලුම තියුණු ලෙස ඉහළ යනු ඇති බවට අනතුරු ඇඟවූ ඔහු, නිසි හානි තක්සේරුවක් ඉදිරිපත් කිරීමට රජය මෙතෙක් අපොහොසත් වී ඇති බවත් පැවසීය.

“නිසි සැලැස්මක්, වැඩසටහනක් හෝ තක්සේරුවක් නොමැති නම්, සිංහල සහ දෙමළ අලුත් අවුරුද්ද වන විට ශ්‍රී ලංකාව දැවැන්ත ආර්ථික කඩාවැටීමක් කරා ගමන් කරයි,” ප්‍රනාන්දු පැවසීය.

“අද දිනය ලියලා තියාගන්න අපි කිව්වා කියලා, අප්‍රේල් 15 වෙද්දී ඩොලරය කීයට යයිද කියලා බලන්න, රටේ ආර්ථිකය මොන විදිහට කප්පාදුවකට ලක්වෙයිද බලන්න. එහෙම වෙනවට අපි කැමති නැහැ, නමුත් මේ තත්ත්වය නිසි ලෙස කළමනාකරණය නොකළොත් එය සිද්ධ වෙයි.” ඔහු තවදුරටත් පැවසීය.

සුළි කුණාටුවේ ආර්ථික බලපෑම හේතුවෙන් රට විදේශ විනිමය අර්බුදයකට ගමන් කරමින් සිටින බව ප්‍රනාන්දු පැවසීය.

“කරුණාකර හානිය හරියට ගණනය කරන්න. රනිල් වික්‍රමසිංහ ඇතුළු අත්දැකීම් ඇති රජයෙන් පිටත සිටින අයට පවා තත්ත්වය කළමනාකරණය කරන්න උදව් වෙන්න පුළුවන්” ඔහු පැවසීය.