අල්ලස් හෝ දූෂණ චෝදනා විමර්ශන කොමිෂන් සභාව මගින් සිදුකෙරෙන මෙහෙයුම් දැඩිවීමත් සමග මෙරට රාජ්‍ය සේවයේ පවතින දූෂණ අක්‍රමිකතා අනාවරණ වීම ඉහළ ගොස් තිබේ.

ඒ අනුව ඉකුත් ජනවාරි මාසයේ සිට ජූලි මාසයේ ගතවූ කාලය දක්වා එම කොමිසමට පැමිණිලි 2,138ක් ලැබී ඇත.

එම පැමිණිලි අනුව වැටළීම් 44ක් සිදුකර, අල්ලස් හා දූෂණ සම්බන්ධ වැරදි සම්බන්ධයෙන් රාජ්‍ය නිලධාරීන් 31ක් අත්අඩංගුවට ගෙන තිබේ.

අත්අඩංගුවට ගත් රාජ්‍ය නිලධාරීන් අතර පාසල් විදුහල්පතිවරුන්, පොලිස් නිලධාරීන්, කම්කරු නිලධාරීන් සහ මෝටර් රථ ප්‍රවාහන දෙපාර්තමේන්තුවේ සේවකයන් ඇතුළත් වේ.

අල්ලස් ගැනීම්, බලතල අයථා පරිහරණය, අක්‍රමවත් ක්‍රියාපටිපාටිය වැනි සිද්ධීන් සම්බන්ධයෙන් සිදුකෙරෙන විමර්ශනවලදී මෙම අත්අඩංගුවට ගැනීම සිදුකර ඇත.

පසුගිය සතියේ අල්ලස් කොමිසම විසින් නීතිවිරෝධී වාහන ලියාපදිංචියක් සම්බන්ධයෙන් මෝටර් රථ ප්‍රවාහන දෙපාර්තමේන්තුවේ නිලධාරීන් තිදෙනකු අත්අඩංගුවට ගෙන ඇත.

එලෙස අත්අඩංගුවට ගත් සැකකරුවන් අතර දැනට ඉඩම් අමාත්‍යාංශයේ ජ්‍යෙෂ්ඨ සහකාර ලේකම්වරයකු ලෙස සේවය කරන හිටපු සහකාර කොමසාරිස්වරයකු, සංවර්ධන සහකාර නිලධාරියකු සහ විමර්ශන නිලධාරියකු ද සිටියි.

නියමිත ක්‍රියාපටිපාටියට පටහැනිව වාහනයක් ලියාපදිංචි කිරීමට අවසර දීම සහ පහසුකම් සැලසීම සම්බන්ධයෙන් ඔවුන්ට චෝදනා එල්ල වී තිබේ.

මැයි මාසයේ සිදුකළ මෙහෙයුමකදී, නියෝජ්‍ය කොමසාරිස්වරයකු ඇතුළු තවත් මෝටර් රථ ප්‍රවාහන දෙපාර්තමේන්තුවේ නිලධාරීන් තිදෙනෙකු අත්අඩංගුවටගනු ලැබූ අතර, නිලධාරීන් විසින් රුපියල් මිලියන 4.1 ක මුදලක් ද සොයාගෙන තිබිණි.

මෙම අත්අඩංගුවට ගැනීම් රාජ්‍ය සේවයේ සෑම තරාතිරමකම පුද්ගලයින් සම්බන්ධයෙන් එල්ල වන දූෂණ චෝදනා විමර්ශනය කර නීතිය යටතේ කටයුතු කරන බවට ප්‍රබල පණිවිඩයක් ලබා දෙන බව අල්ලස් කොමිසම පවසයි.

රාජ්‍ය සේවයේ අවංකභාවය ආරක්ෂා කරන ලෙස රාජ්‍ය නිලධාරීන්ගෙන් ඉල්ලා සිටින එම කොමිසම නව රජය යටතේ ද දූෂණ විරෝධී ක්‍රියාමාර්ග අඛණ්ඩව ක්‍රියාත්මක වන බවට අනතුරු අඟවා තිබේ.

මෙවැනි සිදුවීම් සම්බන්ධයෙන් තොරතුරු ලබා දෙන ලෙස අල්ලස් කොමිසම ජනතාවගෙන් ඉල්ලා සිටින අතර සෑම පැමිණිල්ලක්ම බැරෑරුම් ලෙස සලකන බවට ද සහතික විය.