මෙරට සුඛෝපභෝගී නිවාඩු නිකේතන ව්‍යාපාරයේ විශාලතම පෞද්ගලික අංශයේ ආයෝජනය වන ‘සිටි ඔෆ් ඩ්‍රීම්ස්’ අද විවෘත කෙරේ.

මෙම ව්‍යාපෘතිය මගින් විවේකය, විනෝදාස්වාදය සහ ඉහළ පෙළේ සිල්ලර වෙළඳාම සඳහා කලාපීය ගමනාන්තයක් ලෙස කොළඹට ඇති ආකර්ෂණය ඉහළ නංවනු ඇතැයි අපේක්ෂා කෙරේ.

ජෝන් කීල්ස් හෝල්ඩින්ග්ස් (JKH) හි සහාය ඇතිව, අමෙරිකානු ඩොලර් බිලියන 1.2ක ව්‍යාපෘතියක් ලෙස මෙය ක්‍රියාවට නැංවිණි.

‘සිටි ඔෆ් ඩ්‍රීම්ස්’ විවෘත කිරීමේ අවස්ථාවට බොලිවුඩ් සුපිරි තරුවක් වන රිතික් රෝෂන් ද පැමිණෙනු ඇත.

“ඉහළම මට්ටමේ අන්තර්ජාතික ප්‍රමිතියෙන් යුත් කැසිනෝ ශාලාවක්, අති සුඛෝපභෝගී නුවා හෝටලය සහ දකුණු ආසියාවේ පළමු පූර්ණ ඒකාබද්ධ සුඛෝපභෝගී නිවාඩු නිකේතනයේ ජීවන රටාව කේන්ද්‍ර කරගත් සාප්පු සංකීර්ණය ඇතුළු සියලුම අංග ක්‍රියාත්මක කිරීමට අපි බලාපොරොත්තු වෙමු,” යනුවෙන් ජෝන් කීල්ස් හෝල්ඩින්ග්ස් සභාපති ක්‍රිෂාන් බාලේන්ද්‍ර නිකුත් කළ නිවේදනයක සඳහන් වේ.

‘සිටි ඔෆ් ඩ්‍රීම්ස්’ හි වර්ග අඩි 180,000ක කැසිනෝ ශාලාව හොංකොං හි මෙල්කෝ රිසෝර්ට්ස් ඇන්ඩ් එන්ටර්ටේන්මන්ට් විසින් පවත්වාගෙන යන අතර ඒ වෙනුවෙන් අමෙරිකානු ඩොලර් මිලියන 125ක් පමණ ආයෝජනය කර තිබේ.

ජෝන් කීල්ස් හෝල්ඩින්ග්ස්හි වෝටර්ෆ්‍රන්ට් ප්‍රොපර්ටීස් මගින් බදු දී ඇති ඒකාබද්ධ නිවාඩු නිකේතනය තුළ පිහිටා ඇති කැසිනෝ ශාලාව ක්‍රියාත්මක කිරීම සඳහා ශ්‍රී ලංකා රජය විසින් මෙල්කෝ හි පූර්ණ හිමිකාරීත්වය දරන අනුබද්ධිත ආයතනයකට වසර 20ක බලපත්‍රයක් ලබා දී ඇත.

ගොඩනැගිල්ලේ ඉහළම මහල් පහ වෙන්වී ඇත්තේ නිවාඩු නිකේතනයේ කාමර 113කින් යුත් හෝටලයටයි.

එය මැකාවු සහ පිලිපීනයේ ද ක්‍රියාත්මක වන මෙල්කෝ හි නුවා සන්නාමය යටතේ කළමනාකරණය කරනු ලැබේ.

ජෝන් කීල්ස් හෝල්ඩින්ග්ස් අපේක්ෂා කරන්නේ, ‘සිටි ඔෆ් ඩ්‍රීම්ස්’ ශ්‍රී ලංකාවේ සංචාරක පුනර්ජීවනය, රැකියා උත්පාදනය සහ විදේශ විනිමය ගලා ඒම සඳහා ප්‍රධාන උත්ප්‍රේරකයක් වනු ඇති බවයි.