‘උරුමය’ ජාතික වැඩසටහන යටතේ සින්නක්කර ඔප්පු ලබා දෙන බව පවසමින් රුපියල් මිලියන 100ක පමණ මුදලක් වංචා කළ බවට චෝදනා එල්ල වී ඇති 55 හැවිරිදි පිරිමියකු සහ 43 හැවිරිදි කාන්තාවක් අත්අඩංගුවට ගෙන තිබේ.

පොලිසිය පවසන්නේ 2024 දී ව්‍යාපාර හිමියන් 164 දෙනෙකුට මූල්‍යමය වශයෙන් වංචා කිරීම සම්බන්ධයෙන් සැකකරුවන් අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන ඇති බවයි.

බකමුනේ පදිංචි සැකකාරිය අගෝස්තු 26 වැනිදා අත්අඩංගුවට ගෙන රක්ෂිත බන්ධනාගාරගත කරන ලද අතර, මහරගම පදිංචි සැකකරු සැප්තැම්බර් 29 වැනිදා අත්අඩංගුවට ගෙන තිබේ.

‘උරුමය’ සින්නක්කර ඔප්පු වැඩසටහන යටතේ ඔප්පු ලබා දෙන බව කල්මුනේ ප්‍රදේශයේ පුද්ගලයන් 164 දෙනෙකුට ඒත්තු ගැන්වූ කාන්තාව, පසුව නීතිඥවරියක් ලෙස පෙනී සිටිමින් එක් අයෙකුගෙන් රුපියල් 600,000ක මුදලක් ලබාගෙන ඇති බව විමර්ශනයේදී අනාවරණ වී තිබේ.

තවද, මෙම පුද්ගලයා කල්මුණේ සිට ව්‍යාපාරිකයන් 50 දෙනෙකු පමණ සිරිකොත මූලස්ථානයට සහ කොළඹ ප්‍රමුඛ පෙළේ හෝටල්වලට දේශපාලන සාකච්ඡා කිරීම සඳහා පොළඹවාගෙන ඇති බවත්, සින්නක්කර ඔප්පු පොරොන්දු වී ඔවුන්ට වංචා කර ඇති බවත් අනාවරණ වී ඇත.

සැකකරු සතුව තිබූ වංචනික ලෙස ඉපැයූ බවට සැළකෙන රුපියල් මිලියන 02ක මුදලක් රාජසන්තක කිරීමට නිලධාරීන් නීතිමය පියවර ගෙන ඇත.

අපරාධ පරීක්ෂණ දෙපාර්තමේන්තුව වැඩිදුර පරීක්ෂණ පවත්වයි.