June 5, 2026
චීන ජනාධිපති ෂී ජින්පින් ලබන සතියේදී උතුරු කොරියාවේ නිල සංචාරයක නිරත වීමට නියමිත බව වාර්තා වේ.
මෙය චීන නායකයා වසර හතකට ආසන්න කාලයකට පසු උතුරු කොරියාවේ සිදුකරන පළමු සංචාරයයි.
න්යෂ්ටික අවිවලින් සන්නද්ධ සිය අසල්වැසි රාජ්යය සමඟ පවතින සමීප සබඳතා තවදුරටත් ශක්තිමත් කරගැනීම වෙනුවෙන් චීනය මෑතකාලීනව ගත් පියවර මාලාවක නවතම අවස්ථාව ලෙස මෙම සංචාරය හැඳින්විය හැකිය.
උතුරු කොරියානු නායක කිම් ජොන් අන් මෑත වසරවලදී රුසියාව සමඟ දැඩි සබඳතා ගොඩනඟා ගැනීමට කටයුතු කළ අතර, විශේෂයෙන්ම යුක්රේන යුද්ධය සඳහා රුසියාවට සහාය දැක්වීමට හමුදා භටයින් සහ සාම්ප්රදායික අවි ආයුධ යැවීමට පවා ඔහු පියවර ගත්තේය.
කෙසේ වෙතත්, උතුරු කොරියාවේ විශාලතම වෙළඳ සහකරු මෙන්ම ප්රධානතම ආධාර සපයන්නා වන චීනය සමඟද පසුගිය වසර පුරා සමීපව කටයුතු කිරීමට කිම් ජොන් අන් උත්සුක වී තිබේ.
“උතුරු කොරියාව රුසියාව සමඟ සමීප සබඳතා ගොඩනඟා ගනිමින් සිටින පසුබිමක, චීනය උත්සාහ කරන්නේ ෂී ජින්පින්ගේ මෙම සංචාරය හරහා පියොන්යැං පාලනය කෙරෙහි තමන්ට ඇති බලපෑම නැවත තහවුරු කිරීමට සහ ඊසානදිග ආසියාවේ තම උපායමාර්ගික අවශ්යතා ආරක්ෂා කර ගැනීමටයි” යනුවෙන් ජාත්යන්තර අර්බුද අධ්යයන කණ්ඩායමේ විශ්ලේෂකයෙකු වන විලියම් යැං පවසයි.
දෙරටේම රාජ්ය මාධ්ය නිකුත් කළ කෙටි නිවේදනවලට අනුව, ජනාධිපති ෂී ජින්පින් ලබන සඳුදා සිට අඟහරුවාදා දක්වා මෙම දෙදින නිල රාජ්ය සංචාරයේ නිරත වනු ඇත. ඔහු අවසන් වරට උතුරු කොරියාවේ සංචාරය කළේ 2019 වසරේ ජුනි මාසයේදීය.
මෙම සංචාරය සිදුවන්නේ චීන ජනාධිපතිවරයා විසින් ඇමරිකානු ජනාධිපති ඩොනල්ඩ් ට්රම්ප් සහ රුසියානු ජනාධිපති ව්ලැඩිමීර් පූටින් යන නායකයන් දෙදෙනාවම ඉතා කෙටි කාල පරාසයක් තුළ බීජිං නුවරදී පිළිගෙන සති කිහිපයකට පසුව වීම විශේෂත්වයකි.
උතුරු කොරියාවේ න්යෂ්ටික අවි වැඩපිළිවෙළ දීර්ඝ කාලයක සිට ඇමරිකා එක්සත් ජනපදයේ දැඩි කනස්සල්ලට හේතු වී ඇති අතර ඔවුන් ඊට දැඩි ලෙස විරුද්ධත්වය පළ කරයි. උතුරු කොරියාවේ න්යෂ්ටික හා මිසයිල සංවර්ධන කටයුතු හේතුවෙන් එක්සත් ජාතීන්ගේ සංවිධානය ද ඒ වෙත ආර්ථික සම්බාධක පනවා ඇත.
