පසුගිය මාර්තු 23 වැනිදා කොහුවල දී චීන ජාතික කාන්තාවක් ඝාතනය කිරීම සම්බන්ධයෙන් සොයමින් සිටි සැකකාර 26 හැවිරිදි චීන ජාතිකයා බස්නාහිර පළාත් දකුණු අපරාධ කොට්ඨාසය විසින් අත්අඩංගුවට ගෙන තිබේ.

සැකකරු කොල්ලුපිටියේ ශ්‍රීමත් අනගාරික ධර්මපාල මාවතේ පිහිටි හෝටලයකදී ඊයේ (05) අත්අඩංගුවට ගෙන තිබිණි.

කොහුවල පොලිස් ස්ථානයට භාර දීමට පෙර ඔහු කැමරා තුනක් සහ අයිස් මත්ද්‍රව්‍ය මිලිග්‍රෑම් 280ක් සමඟ අත්අඩංගුවට ගත් බව පොලිසිය පවසයි.

ඝාතනය සම්බන්ධයෙන් අවශ්‍යව සිටි සැකකරු සොයා ගැනීමට සහාය වන ලෙස පොලිසිය මීට පෙර මහජනතාවගෙන් ඉල්ලා තිබිණි.

කොහුවල පොලිස් කොට්ඨාසයේ නිවාස සංකීර්ණයක නිවසක් කුලියට ගෙන පදිංචිව සිටි විදේශීය ජාතික කාන්තාවක් ඇගේ කාමරය තුළ පිහියකින් ඇන ඝාතනය කර තිබිණි.

සැකකරු අද (06) නුගේගොඩ මහේස්ත්‍රාත් අධිකරණයට ඉදිරිපත් කිරීමට නියමිත අතර, කොහුවල පොලිසිය විසින් වැඩිදුර පරීක්ෂණ සිදු කරනු ලැබේ.