බ්‍රිතාන්‍ය රජය ඇන්ඩෲ මවුන්ට්බැටන්-වින්ඩ්සර් රාජකීය අනුප්‍රාප්තික පෙළපතෙන් ඉවත් කිරීම සඳහා නීති සම්පාදනය කිරීම සළකා බලමින් සිටී.

දැනට කෙරෙන පොලිස් විමර්ශනයේ ප්‍රතිඵලය කුමක් වුවත්, ඇන්ඩෲ කිසිදා රජ වීම වළක්වන මෙම පියවර කළ යුතු නිවැරදි දෙය බව ආරක්ෂක අමාත්‍ය ලූක් පොලාර්ඩ් බීබීසීයට පවසා තිබේ.

ළමා ලිංගික මූල්‍යකරුවකු වන ජෙෆ්රි එප්ස්ටයින් සමඟ ඇති සබඳතා සම්බන්ධයෙන් එල්ල වූ පීඩනය මධ්‍යයේ, පසුගිය ඔක්තෝබර් මාසයේදී ‘කුමරු’ යන ඔහුගේ පදවි නාම ඉවත් කරනු ලැබුවද, රජුගේ සහෝදරයා වන ඇන්ඩෲ සිංහාසනයට අනුකූලව දැනට අටවැනි ස්ථානයේ සිටී.

රාජ්‍ය කාර්යාලයේ විෂමාචාරයක් සම්බන්ධයෙන් බ්‍රහස්පතින්දා සවස සැකපිට අත්අඩංගුවට ගැනීමෙන් පැය 11කට පසු ඇන්ඩෲ විමර්ශනයට යටත්ව නිදහස් කරන ලදී.

ඔහු අදාළ චෝදනා දැඩි ලෙස ප්‍රතික්ෂේප කර ඇත.

බීබීසී රේඩියෝ 4 හි වැඩසටහනට අදහස් දක්වමින් පොලාර්ඩ් තහවුරු කළේ හිටපු කුමරු ‘සිංහාසනයෙන් ඈත්ව තැබීම’ සම්බන්ධයෙන් රජය බකිංහැම් මාලිගය සමඟ නියත වශයෙන්ම කටයුතු කරමින් සිටින බවයි.

මෙය පාර්ශව ගණනාවක සහයෝගය ලැබෙනු ඇතැයි තමන් බලාපොරොත්තු වන දෙයක් වුවත් එය පොලිස් විමර්ශනය අවසන් වූ විට පමණක් සිදුවන දෙයක් වීම සාධාරණ බව ඔහු පැවසීය.

මාධ්‍ය වාර්තා කළේ ඇන්ඩෲ වසර ගණනාවක් ජීවත් වූ කාමර 30කින් යුත් වින්ඩ්සර් මාලිගයට අයත් දේපළක් වන රෝයල් ලොජ් වෙත සිකුරාදා පොලිස් මෝටර් රථ සහ වෑන් රථ පැමිණෙනු දක්නට ලැබුණු බවයි.

එක් අවස්ථාවක වාහන 20කට වඩා එහි නවතා ඇති ආකාරය දැකගත හැකි වුවත් ඒ සියල්ල විමර්ශනයට සහ සෝදිසි කිරීම්වලට සම්බන්ධ ද යන්න නොදනී.

ලිබරල් ඩිමොක්‍රටික් පක්ෂය සහ එස්එන්පී ඇතුළු ඇතැම් මන්ත්‍රීවරුන් නීති සම්පාදනයකට සහාය දැක්වීමෙන් පසුව රජයේ නවතම යෝජනාව පැමිණේ.

මෙම පියවර සඳහා පාර්ලිමේන්තු පනතක් අවශ්‍ය වනු ඇති අතර, එය මන්ත්‍රීවරුන් විසින් අනුමත කළ යුතු වේ.

රජු විසින් රාජකීය අනුමැතිය ලබාදුන් විට එය බලාත්මක වනු ඇත.

කැනඩාව, ඕස්ට්‍රේලියාව, ජැමෙයිකාව සහ නවසීලන්තය ඇතුළුව III වන චාල්ස් රාජ්‍ය නායකයා වන පොදුරාජ්‍ය මණ්ඩලීය රටවල් 14 ද එයට සහාය දැක්විය යුතුය.