2024 දී පවත්වන ලද මහජන සමීක්ෂණයක් අනුව ශ්‍රී ලංකාවේ අල්ලස් හා දූෂණවලට වඩාත්ම ගොදුරු විය හැකි ආයතන තුන ලෙස පොලීසිය, දේශපාලනය සහ රේගුව හඳුනාගෙන ඇති බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.

එම කොමිසමේ සභාපති නීල් ඉද්දවෙල කොළඹදී ඊයේ පැවති සම්මන්ත්‍රණයක් අමතමින් කියා සිටියේ, සමීක්ෂණයෙන් පොලිසිය අංක එකේ ස්ථානයේ පසුවන අතර පසුව දේශපාලනය සහ රේගු දෙපාර්තමේන්තුව සිටින බවයි.

ආගමන හා විගමන දෙපාර්තමේන්තුව, පාසල් සහ අධ්‍යාපන අමාත්‍යාංශය, ඉඩම් ලියාපදිංචි කිරීමේ දෙපාර්තමේන්තුව, පළාත් සභා, විදේශ රැකියා කාර්යාංශය, ප්‍රාදේශීය ලේකම් කාර්යාල සහ රෙජිස්ට්‍රාර් ජෙනරාල් දෙපාර්තමේන්තුව යන ආයතන මහජනතාව විසින් ඉස්මතු කරන ලද අනෙකුත් ආයතන අතරට ඇතුළත් විය.

බොහෝ ආයතන සඳහන් කළද, ආර්ථිකයට විශාලතම බලපෑමක් ඇති කරන ආයතන පහක් හඳුනාගෙන ඇති බව ඉද්දවෙල සඳහන් කළේය.

රේගුව, දේශීය ආදායම් දෙපාර්තමේන්තුව සහ පළාත් ආදායම් කාර්යාල, සුරාබදු දෙපාර්තමේන්තුව, ආගමන හා විගමන දෙපාර්තමේන්තුව සහ මෝටර් රථ ප්‍රවාහන දෙපාර්තමේන්තුව එම ආයතනයි.

ජාතික මැණික් හා ස්වර්ණාභරණ අධිකාරිය සහ භූ විද්‍යා සමීක්ෂණ හා පතල් කාර්යාංශය වැනි ආයතන ද මූල්‍ය විෂමාචාර සහ මුදල් විශුද්ධිකරණයට ඉඩ සළසන බව ඔහු පැවසීය.

“දූෂිත සංස්කෘතියකට ඉන්ධන සපයන්නේ නීතිය හා සාමය අසාර්ථක වීම, දූෂණය සාමාන්‍යකරණය වීම සහ මහජනතාව ක්‍රියාමාර්ග ගැනීමට අකමැති වීමයි. දෙන්නා සහ ගන්නා අතර අන්‍යෝන්‍ය එකඟතාවයේ කාරණයක් ලෙස දූෂණය අපට බැහැර කළ නොහැකියි. එය නීතිය යටතේ වරදක්,” ඉද්දවෙල පැවසීය.

ශ්‍රී ලංකා පරිපාලන සේවා සංගමය සහ ශ්‍රී ලංකා පරිපාලන වෘත්තිකයන්ගේ ආයතනය විසින් සංවිධාන කරන ලද මෙම සම්මන්ත්‍රණය ‘ජාතික සංවර්ධනය සඳහා අඛණ්ඩතාව, විනිවිදභාවය සහ යහපාලනය’ යන තේමාව යටතේ පැවැත්විණි.