February 1, 2026
බංග්ලාදේශයේ හිටපු අග්රාමාත්ය ෂෙයික් හසීනා එළඹෙන මහ මැතිවරණය හෙළා දැක තිබේ.
විදෙස් මාධ්ය වාර්තා කළේ ඒ සම්බන්ධයෙන් ඇය පළ කළ අදහස් තීරණාත්මක මැතිවරණයට පෙර ආතතීන් තවත් උග්ර කළ හැකි බවයි.
සිය ගණනක් මරා දැමූ සහ ඇගේ වසර 15 ක පාලනය අවසන් කළ 2024 ශිෂ්ය නැගිටීමේ මර්දනයකදී ඇගේ භූමිකාව සම්බන්ධයෙන් මරණ දඬුවම නියම වූ හසීනා පසුගිය සතියේ විද්යුත් තැපැල් පණිවිඩයක් මගින් මෙම අනතුරු ඇඟවීම සිදු කර තිබිණි.
එහිදී ඇය පවසා තිබුණේ සියලු දෙනා ඇතුළත් සහ නිදහස් හා සාධාරණ මැතිවරණ නොමැතිව, බංග්ලාදේශය දිගුකාලීන අස්ථාවරත්වයකට මුහුණ දෙනු ඇති බවයි.
නොබෙල් සාම ත්යාගලාභී මුහම්මද් යූනුස්ගේ නායකත්වයෙන් යුත් බංග්ලාදේශයේ අන්තර්කාලීන රජය, ඇගේ නායකත්වයෙන් යුත් අවාමි ලීග් පක්ෂය මැතිවරණයෙන් බැහැර කිරීමෙන් හිතාමතාම ඇගේ ආධාරකරුවන් මිලියන ගණනකගේ ඡන්ද අයිතිය අහිමි කළ බව ද ඇය කියා සිටියාය.
“ජනගහනයෙන් සැලකිය යුතු කොටසකට දේශපාලන සහභාගීත්වය අහිමි කරන සෑම අවස්ථාවකම, එය අමනාපය ගැඹුරු කරයි, ආයතන නීති විරෝධී කරයි සහ අනාගත අස්ථාවරත්වය සඳහා කොන්දේසි නිර්මානය කරයි,” ඇය සඳහන් කළාය.
“බැහැර කිරීමෙන් උපන් රජයකට බෙදී ගිය ජාතියක් එක්සත් කළ නොහැක,” යනුවෙන් ද හිටපු අග්රාමාත්යවරිය පවසා තිබේ.
බංග්ලාදේශයේ මිලියන 127 කට වැඩි පිරිසක් පෙබරවාරි 12 වන දින පැවැත්වෙන මැතිවරණයේදී ඡන්දය ප්රකාශ කිරීමට සුදුසුකම් ලබා ඇති අතර, එය හසීනා බලයෙන් ඉවත් කිරීමෙන් පසු පැවැත්වෙන පළමු මහ මැතිවරණයයි.
