ඉහළ වැටුප් ඉල්ලමින් බංග්ලාදේශයේ ඇඟලුම් කම්කරුවන් ආරම්භ කළ විරෝධතා තෙවැනි දිනටත් සක්‍රියව පැවැති අතර, පාරවල් වටලමින්, පොලිස් සහ අනෙකුත් වාහනවලට පහර දෙමින්, ගබඩාවකට ගිනි තබමින් ප්‍රචණ්ඩකාරී ලෙස හැසිරී තිබේ.

බංග්ලාදේශයේ සමස්ත අපනයන ආදායමෙන් 80%ක් සහ GDP ප්‍රමාණයෙන් 10%ක් තීරණය කරන, මිලියන 4කට ආසන්න පිරිසකට රැකියා සපයන ඇඟලුම් ක්ෂේත්‍රයේ කර්මාන්තශාලා සිය ගණනක් වසා දැමීමට සිදු විය. මෙයින් කම්කරුවන් මිලියනයකට ආසන්න සංඛ්‍යාවකට බලපෑම් එල්ල වී ඇත.

ලෝක බැංකු පුරෝකථනයන්ට අනුව 2025–26 වසර සඳහා බංග්ලාදේශයේ ආර්ථික වර්ධනය 3.4% දක්වා පහත බසිනු ඇත. මෙය 2020 කොවිඩ් වසරෙන් පසු වාර්තා වන අඩුම වර්ධන වේගයයි.

ඉහළ යන උද්ධමනය හමුවේ ඇති වූ මෙම නොසන්සුන්තාව පිටුපස හිටපු අග්‍රාමාත්‍ය ෂෙයික් හසීනාගේ අවාමි ලීගය සිටින බවට වත්මන් රජය චෝදනා කරයි. 2024 අගෝස්තු 5 වැනිදා හසීනා බලයෙන් නෙරපීමෙන් පසු එරට ආර්ථිකය දැඩි ලෙස පසුබැසීමට ලක් වූ බව විශේෂඥයෝ පෙන්වා දෙති.