සමාජ මාධ්‍ය ඔස්සේ පුද්ගලයකුට සවලකින් පහර දෙන ආකාරය දැක්වෙන සිද්ධිය සම්බන්ධයෙන් පොලිසිය සැකකරුවන් හත් දෙනෙකු අත්අඩංගුවට ගෙන තිබේ.

පසුගිය පෙබරවාරි 9 වැනිදා වැලිකඩ පොලිස් ස්ථානයට පැමිණිල්ලක් ඉදිරිපත් කිරීමෙන් පසු මේ සම්බන්ධයෙන් පරීක්ෂණයක් ආරම්භ කළ බව පොලිස් මාධ්‍ය අංශය පැවසීය.

පොලිසියට අනුව, වින්දිතයා පසුව පැමිණිල්ලක් ගොනු කර ඇති අතර පරීක්ෂණවලින් හෙළි වූයේ මෙම සිදුවීම මාස දෙකකට පමණ පෙර සිදුවී ඇති බවයි.

පෙබරවාරි 10 වැනිදා රාත්‍රියේ කොළොන්නාව, බොරැල්ල සහ වත්තල යන ප්‍රදේශවල සිදු කරන ලද මෙහෙයුම්වලදී සිධියට සම්බන්ධ සැකකරුවන් පස් දෙනෙකු අත්අඩංගුවට ගෙන ඇත.

පෙබරවාරි 11 වැනිදා උදෑසන වැලිකඩ පොලිසියට භාර වූ තවත් සැකකරුවන් දෙදෙනෙකු අත්අඩංගුවට ගෙන ඇත.

සැකකරුවන් වයස අවුරුදු 15ත් 24ත් අතර වන අතර ඔවුන් රාජගිරිය, බොරැල්ල, කොළොන්නාව සහ වත්තල යන ප්‍රදේශවල පදිංචිකරුවන් බව පොලිසිය පැවසීය.

සැකකරුවන් ඊයේ (11) අලුත්කඩේ මහේස්ත්‍රාත් අධිකරණය අංක 04 වෙත ඉදිරිපත් කරන ලදී.

පෙබරවාරි 16 වැනිදා පැවැත්වීමට නියමිත හඳුනාගැනීමේ පෙරෙට්ටුවක් සඳහා ඉදිරිපත් කරන තෙක් සැකකරුවන් දෙදෙනෙකු මාකොළ ළමා රැඳවුම් මධ්‍යස්ථානයේ රඳවා තබා ගැනීමට අධිකරණය නියෝග කළ අතර, ඉතිරි සැකකරුවන් රක්ෂිත බන්ධනාගාර ගත කරන ලදී.

වැලිකඩ පොලිසිය විසින් වැඩිදුර පරීක්ෂණ පවත්වනු ලැබේ.