1970 වසරේ දී අභ්‍යවකාශ යානයේ සිදු වූ පිපිරීමකින් පසුව පවා ඇපලෝ 13 මෙහෙයුමේ සිටි පිරිස ආරක්ෂිතව පෘථිවියට ගෙන ඒමට මඟ පෙන්වූ ගගනගාමී ජිම් ලොවෙල් මියගොස් තිබේ.

ලොවෙල් මියයන විට වයස අවුරුදු 97ක් පසුකර සිටියේය.

ඇපලෝ 13 මෙහෙයුම අතරතුර පෘථිවියේ සිට සැතපුම් ලක්ෂ ගණනක් දුරින් සිටියදී අභ්‍යවකාශ යානයේ සිදු වූ පිපිරීමක් හේතුවෙන් සඳ මතට ගොඩබෑමේ උත්සාහය නවතා ආපසු පැමිණීමේ දී විය හැකිව තිබු ඛේදවාචකයක් වළක්වා ගනු ලැබුවේ ලොවෙල් බව නාසා පැවසීය.

ලොවෙල් සහ තවත් ගගනගාමීන් දෙදෙනෙකු පැසිෆික් සාගරයට ආපසු පැමිණි මොහොත දස ලක්ෂ සංඛ්‍යාත ජනතාවක් රූපවාහිනියෙන් නැරඹූ අතර එය අභ්‍යවකාශ ගමන් ඉතිහාසයේ වඩාත්ම කැපී පෙනෙන එකක් බවට පත්විය.

ඇපලෝ 8 මෙහෙයුමට ද දායක වී ඇති ලොවෙල්, දෙවරක් සඳට ගිය පළමු මිනිසා විය.

එහෙත් කිසි විටෙකත් ඔහු සඳ මත ගොඩ බැස්සේ නැත.

එක්සත් ජනපද අභ්‍යවකාශ වැඩසටහනේ ඓතිහාසික මාවතක් නිර්මාණය කිරීමට ලොවෙල් උදව් කළ බව නාසා හි වැඩබලන ප්‍රධානී ෂෝන් ඩෆි පැවසීය.

ප්‍රකාශයක් නිකුත් කරමින් ලොවෙල්ගේ පවුලේ අය පවසා තිබුණේ “ඔහුගේ නොසැලෙන ශුභවාදී බව, ඔහුගේ හාස්‍යජනක හැඟීම සහ ඔහු අප සෑම කෙනෙකුටම කළ නොහැකි දෙයක් කළ හැකි යැයි හැඟෙන ආකාරය අප දිරි ගැන්වීම අපට මග හැරෙනු ඇත. ඔහු සැබවින්ම අද්විතීය කෙනෙක්.”යනුවෙනි.

1995 දී ඇපලෝ 13 චිත්‍රපටයේ ලොවෙල් ලෙස රඟපෑ ටොම් හැන්ක්ස්, ලොවෙල්ව හැඳින්වූයේ එඩිතර, සිහින දකින සහ අප තනිවම නොයන ස්ථාන කරා අන් අයව ගෙන යන අයගෙන් කෙනෙකු ලෙසයි.

හැන්ක්ස් ඉන්ස්ටග්‍රෑම් හි ප්‍රකාශයක් නිකුත් කරමින් කියා සිටියේ ලොවෙල්ගේ බොහෝ ත්‍රාසජනක ගමන් ධනය හෝ කීර්තිය සඳහා නිර්මාණය කරන ලද්දක් නොවන බවයි