December 10, 2024
හිටපු දේශපාලඥයකු විසින් සිංහල සමාජයට හඳුන්වාදුන් කුඩා පවුල (පුංචි පවුල රත්තරන්) සංකල්පය සතුන්ගේ ගහණය පාලනය කිරීමට යොදාගත යුතු බව ජනසෙත පෙරමුණේ නායක බත්තරමුල්ලේ සීලරතන හිමියෝ පවසති.
කෘෂිකර්ම අමාත්‍ය කේ.ඩී.ලාල්කාන්ත පාර්ලිමේන්තුවේදී කළ ප්‍රකාශයකට ප්‍රතිචාර දක්වමින් උන්වහන්සේ මේ බව කියාසිටියහ.
ජනමාධ්‍ය අමතමින් සීලරතන හිමියෝ ප්‍රකාශ කළේ, 1980 දශකයේ සිංහල ජාතිය වඳකිරීමේ අරමුණින් ‘පුංචි පවුල රත්තරං’ සංකල්පය හඳුන්වාදුන් බවයි.
තම වගාවන් විනාශ කරන සතුන්ට එරෙහිව ක්‍රියාමාර්ග ගැනීමට ජනතාවට ඉඩ දිය යුතු බවට අමාත්‍ය ලාල්කාන්ත පසුගියදා පාර්ලිමේන්තුවේදී යෝජනා කළේය.
එවැනි ප්‍රකාශයන් මගින් ග්‍රාමීය ප්‍රජාවන් නොමග යවා වගාවන්ට හානි කරන සතුන් ඝාතනය කිරීමට රජය අවසර දී ඇතැයි විශ්වාස කළ හැකි බව උන්වහන්සේ තර්ක කළහ.
ඔවුන් කිසියම් සතෙකු ඝාතනය කළහොත් පොලිසිය ඔවුන්ට එරෙහිව නීතිමය ක්‍රියාමාර්ග ගන්නා බවත්, එහි ප්‍රතිඵලය වන්නේ සිරගත කිරීමට ඉඩ ඇති බවත් සීලරතන හිමියෝ වැඩිදුරටත් පැවසූහ.
ඇමැති ලාල්කාන්තගේ ප්‍රකාශය ප්‍රායෝගික නොවන බව විවේචනය කළ උන්වහන්සේ, ඉඩම් හිමියන්ට සහ ගොවීන්ට වගා හානිකරන සතුන්ට එරෙහිව හානිකර ක්‍රියාමාර්ග ගැනීමට හේතු විය හැකි නව නීති යෝජනා කිරීම සම්බන්ධයෙන් මහජනතාවගෙන් සමාව ගන්නා ලෙසද ඇමැතිවරයාගෙන් ඉල්ලා සිටියහ.
