වසර 130 ක් පැරණි නුවරඑළිය තැපැල් කාර්යාල ගොඩනැගිල්ල සංචාරක ව්‍යාපාරයට අදාළ කර ගැනීමට සකස් කර තිබූ පැවැති රජයේ සැලසුම් අත්හිටුවමින් තැපැල් දෙපාර්තමේන්තුවේ මෙහෙයුම් කටයුතු සඳහා පමණක් එම ගොඩනැගිල්ල පවත්වා ගෙනයෑමට ජනාධිපති අනුර කුමාර දිසානායක ප්‍රමුඛ නව පාලනය තීරණය කර තිබේ.

මෙම තීරණය ප්‍රකාශයට පත්කරමින් අමාත්‍ය විජිත හේරත් පැවසුවේ නුවරඑළිය තැපැල් කාර්යාලයේ දේපළ, තැපැල් දෙපාර්තමේන්තුවේ ප්‍රයෝජනය සඳහා පමණක් සුරක්ෂිත කරන බව සහ වෙනත් කිසිදු කටයුත්තක් සඳහා එය නිදහස් නොකරන බවයි.

නුවරඑළිය තැපැල් කාර්යාලයේ දේපළ සම්බන්ධයෙන් මීට පෙර ගත් සියලු තීරණ අත්හිටුවන බවද ඔහු දැනුම් දුන්නේය.

ප්‍රදේශයේ සංචාරක ව්‍යාපාරය වැඩිදියුණු කිරීමේ හෝටල් ව්‍යාපෘතියක් ලෙස නුවරඑළිය තැපැල් කාර්යාලය ටාජ් හෝටලයට ලබාදීමට පැවැති රජය සැලසුම් කර තිබිණි.

පසුගිය වසරේ නොවැම්බරයේදී එවකට ආණ්ඩුව සැලැස්මට එරෙහිව විරෝධතා පැවැත්වුණු අතර, තැපැල් කාර්යාල ගොඩනැගිල්ල අවට ඉඩම්වල හෝටලයක් පිහිටුවීමට පමණක් සැලසුම් කර ඇති බව හිටපු ජනාධිපති රනිල් වික්‍රමසිංහ පැවසුවේය.

තැපැල් කාර්යාල ගොඩනැගිල්ල කඩා ඉවත් කිරීමේ සූදානමක් නොමැති බව අවධාරණය කළ හිටපු ජනාධිපති රනිල් වික්‍රමසිංහ පවසා තිබුණේ යෝජිත ගොඩනැගිල්ල ප්‍රතිසංස්කරණය කිරීම පමණක් සිදකරන බවයි.