රාජ්‍ය බුද්ධි සේවයේ (SIS) හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේ දැඩි කායික සෝදිසියකට ලක්කළ බව අපරාධ පරීක්ෂණ දෙපාර්තමේන්තුව (CID) ප්‍රථම වතාවට පිළිගෙන ඇතැයි ඔහුගේ බිරිඳ වන මනෝරි සලේ අද (17) චෝදනා කළාය.

ශ්‍රී ලංකා මානව හිමිකම් කොමිෂන් සභාවේ පැවැති විමර්ශන කටයුත්තකින් අනතුරුව ජනමාධ්‍ය වෙත අදහස් දක්වමින් මනෝරි සලේ කියාසිටියේ, තම සැමියාව සිරමැදිරියෙන් ඉවතට ගෙන, අන් අය ඉදිරියේ නිරුවත් කර, අත්විලංගු දමා තිබියදීම ඔහුගේ මළමාර්ගය දැඩි ලෙස සෝදිසි කිරීමට ලක් කළ බව CIDය නිල වශයෙන් පිළිගත් බවයි.

ඇය පවසන පරිදි, මාර්තු 8 වැනිදා මෙම සිදුවීම සිදු වූ දින සිට CIDය දිගින් දිගටම මෙම චෝදනා ප්‍රතික්ෂේප කර තිබිණි.

කෙසේවෙතත්, පෙර අවස්ථාවකදී පෙනී සිටීමට අපොහොසත් වීමෙන් පසු, මෑතකදී පැවැති මානව හිමිකම් කොමිසම් සැසියට පැමිණි CID නිලධාරීන් මෙම ක්‍රියාව සිදුකළ බව නිල වශයෙන් පිළිගෙන ඇති බව ඇය පැවැසුවාය.

මෙම පිළිගැනීමෙන් පසුව, අදාළ සිදුවීමට අදාළ CCTV දර්ශන, සෝදිසි කිරීමට සම්බන්ධ වූ නිලධාරීන්ගේ නම් සහ එවැනි සෝදිසි කිරීම් සඳහා මාර්ගෝපදේශ සපයන නිල චක්‍රලේඛ ඉදිරිපත් කරන ලෙස කොමිෂන් සභාව CIDයෙන් ඉල්ලා සිටි බවද ඇය සඳහන් කළාය.

“සලේව මුලින්ම අධිකරණ භාරයට ගෙන අධිකරණ වෛද්‍ය නිලධාරියා වෙත ඉදිරිපත් කරන විට ඔහු යහපත් සෞඛ්‍ය තත්ත්වයෙන් පසු වුණා. ඔහුව විශේෂ ‘දඬුවම් මැදිරියකට’ මාරුකිරීමෙන් පසුවයි මෙම දරුණු සෝදිසි කිරීම් සහ වධහිංසා පැමිණවීම් ආරම්භ වුණේ,” යැයි ඇය පැවසුවාය.

තම සැමියා දැනට රඳවා සිටින තත්ත්වය පිළිබඳව වැඩිදුරටත් විස්තර කළ මනෝරි සලේ, ඔහු කිසිදු වාතාශ්‍රයක් නොමැති අඩි 6×4 ප්‍රමාණයේ කුඩා සිරමැදිරියක රඳවා සිටින බව ප්‍රකාශ කළාය.

මානසික වධහිංසාවක් ලෙස සිරමැදිරියේ විදුලි බුබුලක් පැය 24 පුරාම දල්වා තබා ඇති බවත්, පළමු දින 40 තුළ ඔහුට හිස් සිමෙන්ති පොළොව මත නිදාගැනීමට බලකළ බවත් ඇය චෝදනා කළාය.

එම සිරමැදිරි පරිශ්‍රය මීයන්ගෙන් ගහණ වී ඇති අතර, මීයන් චලනය නිසා එම තට්ටුවේම සිටි තවත් රැඳවියන් දෙදෙනකුට හෝ තිදෙනකුට මීට පෙර වෛද්‍ය එන්නත් ලබාදීමට පවා සිදු වූ බව ඇය කියා සිටියාය.

සිරමැදිරිය වැසිකිළිවලට ඉතා ආසන්නව පිහිටීම නිසා ඇති වන දැඩි දුර්ගන්ධය හේතුවෙන් තම සැමියාගේ නිදන්ගත ඉරුවාරදය තත්ත්වය තවත් උග්‍ර වී ඇති බවටද ඇය චෝදනා කළාය.

ඔහුගේ බිරිඳට අනුව, සලේ දිගින් දිගටම ආහාර සහ දියර වර්ග ප්‍රතික්ෂේප කරමින් උපවාසයක නිරත වන අතර, වෛද්‍ය කාර්ය මණ්ඩලය විසින් සේලයින් මඟින් ඔහුගේ ජීවිතය යාන්තමින් පවත්වාගෙන යනු ලබන බවත්, ඔහු දැනට අතිශය දුර්වල තත්ත්වයක පසුවන බවත්, කතා කිරීමට දැඩි අපහසුවක් දක්වන බවත්, දිගු වේලාවක් කෙළින් වාඩි වී සිටීමට නොහැකි බවත්, සේලයින් කටු දිගුකාලීනව ගැසීම හේතුවෙන් ඔහුගේ අත් බරපතළ ලෙස ඉදිමී ඇති බවත් ඇය විස්තර කළාය.

සිදුවෙමින් පවතින මෙම මානව හිමිකම් උල්ලංඝනය කිරීම් විස්තර කරමින් සහ ඒ සඳහා මැදිහත් වන ලෙස ඉල්ලමින් තමන් අවස්ථා දෙකකදී ජනාධිපතිවරයා වෙත ලිපි යැවූ නමුත් අද දක්වා ඒ වෙනුවෙන් කිසිදු නිල ප්‍රතිචාරයක් හෝ ලිපිය ලැබුණු බවට සරල දැනුම් දීමක් හෝ තමන්ට ලැබී නොමැති බවත් මනෝරි සලේ වැඩිදුරටත් සඳහන් කළාය.