දිට්වා සුළි කුණාටුවෙන් පසු දිවයින පුරා සිදුකෙරෙන මෙහෙයුම් සඳහා සහාය වීමට ආසියානු සංවර්ධන බැංකුව (ADB) ශ්‍රී ලංකාවට අමෙරිකානු ඩොලර් මිලියන 3ක ආපදා සහන ප්‍රදානයක් අනුමත කර තිබේ.

අයහපත් කාලගුණික තත්ත්වයන්ගෙන් පීඩාවට පත් තායිලන්තය සහ වියට්නාමය සඳහා ද ආසියානු සංවර්ධන බැංකුව අමෙරිකානු ඩොලර් මිලියන 2 බැගින් අනුමත කර ඇත.

අදාළ රජයන්ගෙන් ලැබුණු සහාය ඉල්ලීම්වලින් පසුව ආසියානු සංවර්ධන බැංකුවේ සභාපති මසටෝ කන්ඩා මෙම නිවේදනය නිකුත් කළේය.

“මෙම විනාශකාරී ගංවතුර නිසා ඇති වූ දුක් වේදනා ගැන මම අතිශයින් කණගාටු වෙනවා,” යැයි කන්ඩා පැවසීය.

“ජීවිත බේරා ගැනීමට සහ ප්‍රජාවන් නැවත ගොඩනැගීමට ආසියානු සංවර්ධන බැංකුවේ සහාය ලබා දෙන බවට ශ්‍රී ලංකාවේ, තායිලන්තයේ සහ වියට්නාමයේ රජයන්ට සහ ජනතාවට සහතික වෙන්න පුළුවන්. මෙම භයානක සිදුවීම්වලින් පීඩාවට පත් වූවන්ට නවාතැන් දීම, සැනසීම සහ බලාපොරොත්තුව ගෙන ඒම සඳහා අපි රජයන් සමඟ ඉක්මනින් සහ සහයෝගයෙන් කටයුතු කරනවා.” යැයි ඔහු පැවසීය.

මෙම ප්‍රදාන හදිසි සහ මානුෂීය මෙහෙයුම්වලට සහාය වනු ඇත.

සංවර්ධනය වෙමින් පවතින සාමාජික රටවලට වේගවත් ප්‍රදාන සපයන ආසියා පැසිෆික් ආපදා ප්‍රතිචාර අරමුදලෙන් (APDRF) මෙම අරමුදල් ලැබෙනු ඇත.

ගංවතුර හේතුවෙන් ශ්‍රී ලංකාව සහ අග්නිදිග ආසියානු රටවල් කිහිපයක ජීවිත හානි සහ දේපළ හා යටිතල පහසුකම්වලට හානි සිදුවී ඇත.

ආසියානු සංවර්ධන බැංකුව යනු ආසියාව සහ පැසිෆික් කලාපයට සහාය වන ප්‍රමුඛ බහුපාර්ශ්වික සංවර්ධන බැංකුවකි.

1966 දී ආරම්භ කරන ලද ආසියානු සංවර්ධන බැංකු කලාපයේ සාමාජිකයන් 69 දෙනෙකු සිටින අතර ඉන් 50ක් කලාපය නියෝජනය කරයි.