හෝමාගම, ගලගාහේන ප්‍රදේශයේ ඇළ මාර්ගයක තිබී ඊයේ (16) අලුයම සොයාගත් පුද්ගල මළසිරුර, ගෙළ කපා සිදුකරන ලද අමානුෂික මනුෂ්‍ය ඝාතනයක් බව පශ්චාත් මරණ පරීක්ෂණයේදී නිල වශයෙන් අනාවරණය වී තිබේ.

මෙලෙස අවාසනාවන්ත ලෙස ජීවිතක්ෂයට පත්ව ඇත්තේ හෝමාගම, පිටිපන ප්‍රදේශයේ පදිංචිව සිටි 41 හැවිරිදි පුද්ගලයෙකි.

ඔහු ඇඟලුම් ආයතනයක ස්ථිර රැකියාවක නිරත වන අතරතුර, සිය අමතර ආදායම් මාර්ගය ලෙස ඇප් (App) තාක්ෂණය ඔස්සේ ක්‍රියාත්මක වන කුලී යතුරුපැදි රියදුරකු ලෙස ද කටයුතු කර ඇත.

පොලිස් විමර්ශනවලට අනුව, ඉකුත් 15 වැනිදා රාත්‍රී 7.00ට පමණ ඇප් එක හරහා ලැබුණු කුලී ගමනක් සඳහා පුද්ගලයකු ප්‍රවාහනය කිරීමට ඔහු සිය යතුරුපැදියෙන් නිවසින් පිටත්ව ගොස් තිබේ.

ඇළ මාර්ගය අසල පිහිටි පාළු වෙන්දේසි ඉඩමක් තුළදී මෙම ඝාතනය සිදුකර ඇති බවට විශ්වාස කෙරේ.

මියගිය පුද්ගලයා සතු වූ යතුරුපැදිය, රන් මාලය, ජංගම දුරකථනය සහ මුදල් පසුම්බිය ඝාතකයන් විසින් පැහැරගෙන පළාගොස් ඇත.

අපරාධය සිදුවූ බවට සැකකෙරෙන ඉඩම පරීක්ෂා කිරීමේදී මියගිය පුද්ගලයාගේ බවට සැකකෙරෙන පාවහන් යුගලක් සහ රුපියල් 20ක මුදල් නෝට්ටුවක් පොලිසිය විසින් සොයාගෙන තිබේ.

මහෙස්ත්‍රාත් පරීක්ෂණයෙන් අනතුරුව හෝමාගම මූලික රෝහලේදී ඊයේ පවත්වන ලද පශ්චාත් මරණ පරීක්ෂණයේදී තහවුරු වී ඇත්තේ, තියුණු ආයුධයකින් බරපතළ ලෙස ගෙළ කපා දැමීම හේතුවෙන් සිදු වූ අධික රුධිර වහනයෙන් මෙම මරණය සිදුව ඇති බවයි.

ඝාතනයට සහ කොල්ලකෑමට සම්බන්ධ සැකකරුවන් මෙතෙක් අනාවරණය වී නොමැති අතර, ඔවුන් හඳුනාගෙන කඩිනමින් අත්අඩංගුවට ගැනීම සඳහා හෝමාගම පොලිසිය විසින් විශේෂ විමර්ශන කණ්ඩායම් කිහිපයක් යොදවා මෙහෙයුමක් ආරම්භ කර ඇත.