යාපනය අන්තර්ජාතික ගුවන්තොටුපළට නව පර්යන්ත ගොඩනැගිල්ලක් ඉදිකිරීමට සැලසුම් කර තිබේ.

ඊට අමතරව එහි ධාවන පථ පුළුල් කිරීමේ හැකියාවද දැනට සළකා බලමින් පවතී.

වරාය හා සිවිල් ගුවන් සේවා නියෝජ්‍ය අමාත්‍ය ජනිත රුවන් කොඩිතුවක්කු පැවසුවේ පලාලි හි පිහිටි යාපනය අන්තර්ජාතික ගුවන්තොටුපළේ නව පර්යන්ත ගොඩනැගිල්ලක් ඉදිකිරීම සඳහා කොන්ත්‍රාත්කරුවකු හඳුනා ගැනීම සඳහා ටෙන්ඩර් ක්‍රියාවලිය ආරම්භ කර ඇති බවයි.

“යාපනය අන්තර්ජාතික ගුවන්තොටුපළේ නව පර්යන්ත ගොඩනැගිල්ලක් ඉදිකරනවා. අපි දැනට ටෙන්ඩර් ක්‍රියාවලියේ ඉන්නේ,” යනුවෙන් ඔහු පැවසීය.

ගුවන්තොටුපළේ නව පර්යන්ත ගොඩනැගිල්ලේ යෝජිත ඉදිකිරීම් සඳහා රජය විසින් සම්පූර්ණයෙන්ම අරමුදල් සපයන බවත්, ව්‍යාපෘතිය සඳහා ආසන්න වශයෙන් රුපියල් මිලියන 600ක් වැය වනු ඇතැයි ඇස්තමේන්තු කර ඇති බවත් ඔහු තවදුරටත් හෙළි කළේය.

නිශ්චිත කාලරාමුවක් නියම කිරීම දැනට කළ නොහැකි බව ඔහු පිළිගත් අතර, නව පර්යන්තය වසර දෙකක් ඇතුළත අවසන් කළ හැකි බවට ඔහු විශ්වාසය පළ කළේය.

ගුවන්තොටුපළේ ධාවන පථය දිගු කිරීමට රජය සැලසුම් කරමින් සිටින බව නියෝජ්‍ය අමාත්‍යවරයා තවදුරටත් අනාවරණ කළේය.

කෙසේවෙතත්, ව්‍යාපෘතිය එහි මූලික අදියරේ පවතින බැවින්, විධිමත් ප්‍රසම්පාදන ක්‍රියාවලියක් තවමත් ආරම්භ කර නොමැති බව පැහැදිලි කළ ඔහු යෝජිත පුළුල් කිරීමේ හැකියාවන් තක්සේරු කිරීම සඳහා දියත් කරන ලද ශක්‍යතා අධ්‍යයනයේ ප්‍රතිඵල තවමත් බලාපොරොත්තුවෙන් සිටින බව පැවසීය.

කොඩිතුවක්කු තහවුරු කළේ මත්තල රාජපක්ෂ අන්තර්ජාතික ගුවන්තොටුපළ (MRIA) සම්බන්ධයෙන් පෙර පරිපාලනයේ ප්‍රවේශය මෙන් නොව, යාපනය අන්තර්ජාතික ගුවන්තොටුපළේ කළමනාකරණය බාහිර පාර්ශවයකට පැවරීමට රජයට කිසිදු අදහසක් නොමැති බවයි.

යාපනය අන්තර්ජාතික ගුවන්තොටුපළ රජයේ පාලනය යටතේ පවතින බව ඔහු අවධාරණය කළේය.

කලින් පලාලි ගුවන්තොටුපළ ලෙස හැඳින්වූ යාපනය අන්තර්ජාතික ගුවන්තොටුපළ, බ්‍රිතාන්‍ය සන්නද්ධ හමුදා විසින් පලාලි හි අක්කර 359ක ඉඩමක ස්ථාපිත කරන ලද අතර, එහි සිට වූ පළමු ගුවන් ගමන 1947 දෙසැම්බර් 10 වැනිදා ඉන්දියාවට සිදු විය.