ඉඩම් ගොඩකිරීමේ සහ සංවර්ධනය කිරීමේ සංස්ථාවේ කොටස් 5,000ක් මිලදී ගැනීම සඳහා රාජ්‍ය දැව සංස්ථාව රුපියල් 5,008,000ක් ආයෝජනය කර දශක හතරකට ආසන්න කාලයක් ගතවී ඇතත්, ඔවුන් මෙම ආයෝජනයෙන් කිසිදු ලාභාංශයක් හෝ ප්‍රතිලාභයක් ලබා ගැනීමට අපොහොසත් වී ඇති බව නවතම විගණන වාර්තාවකින් හෙළිකර තිබේ.

1985 ඔක්තෝබර් 38 වැනිදා කොටස් අත්පත් කර ගැනීම සිදුකර ඇතත්, ආයෝජනය අයකර ගැනීමට හෝ එය ඵලදායී ලෙස භාවිතයට ගැනීමට කිසිදු ක්‍රියාමාර්ගයක් ගෙන නොමැති බව විගණනයෙන් හෙළි වී ඇත.

එමඟින් රාජ්‍ය දැව සංස්ථාවේ කළමනාකරණය සහ වගවීම සම්බන්ධයෙන් බරපතළ ප්‍රශ්න මතු වේ.

අඛණ්ඩ පාඩු ලැබීම් තිබියදීත්, මෙම මූල්‍ය ගැටලුව විසඳීමට හෝ ප්‍රතිලාභ ජනනය කිරීම සඳහා විකල්ප ගවේෂණය කිරීමට රාජ්‍ය දැව සංස්ථාව කටයුතු කර නැත.

මෙතරම් දීර්ඝ කාලයක් ආයෝජනය ඵලදායී නොවන ලෙස පැවතීමට ඉඩ දීම සම්බන්ධයෙන් විගණන වාර්තාව රාජ්‍ය දැව සංස්ථාව දැඩි ලෙස විවේචනය කර ඇති අතර, අරමුදල් ඵලදායී ලෙස භාවිත කිරීමට වහාම පියවර ගන්නා ලෙස දැනුම් දී ඇත.

ඊට ප්‍රතිචාර වශයෙන් රාජ්‍ය දැව සංස්ථාව කළමනාකාරිත්වය ඉදිරිපත් කර ඇති ප්‍රකාශය නොපැහැදිලි වූ අතර, අධ්‍යක්ෂ මණ්ඩලය නියෝජනය කරන සාමාන්‍යාධිකාරීවරයා මෙම කාරණය ‘අනාගතයේදී සොයා බැලිය හැකි’ බව පමණක් සඳහන් කර තිබේ.

මෙම ප්‍රමාදය වැරදි කළමනාකරණය සහ මහජන අරමුදල් නොසළකා හැරීම පිළිබඳ කණස්සල්ලට හේතු වී තිබේ.

ඉඩම් ගොඩකිරීමේ සහ සංවර්ධනය කිරීමේ සංස්ථාවේ අධ්‍යක්ෂ මණ්ඩලයේ සාමාජිකයකු ලෙසද සේවය කරන රාජ්‍ය දැව සංස්ථා සාමාන්‍යාධිකාරී ආචාර්ය එන්.ඩී. රුවන්පතිරණ පවසන්නේ ලාභාංශ ගෙවන ලෙස ඉඩම් ගොඩකිරීමේ සහ සංවර්ධනය කිරීමේ සංස්ථාව වෙත ඉල්ලීමක් කර ඇති බවයි.

කෙසේවෙතත්, සමාගම ලාභ නොලබන බැවින් ලාභාංශ ගෙවීමට නොහැකි බවට 2024 අගභාගයේදී ප්‍රතිචාරයක් ලැබුණු බව ඔහු පැවසීය.

“මේ මොහොතේ ගෙවීමට ඇති නොහැකියාව පිළිබඳ ඔවුන් අපට දැනුම් දුන් නිසා අපි බලා සිටිනවා. ඔවුන් ලාභ ලබන බව පෙනේ නම් කාරණය නැවත මතු කරන්න මම බලාපොරොත්තු වෙනවා. රාජ්‍ය සමාගම්වලට එරෙහිව නීතිමය පියවර නොගන්නා ලෙස ඉල්ලා තිබෙන නිසා අපට කිසිදු නීතිමය ක්‍රියාමාර්ගයක් ගන්න බැහැ.” යනුවෙන් ඔහු සඳහන් කර තිබේ.

නීතිමය ක්‍රියාමාර්ග වෙනුවට අමාත්‍යාංශ ලේකම්වරුන් හරහා සාකච්ඡා කිරීම ගැටළු විසඳීමේ ක්‍රමය බව ඔහු පැවසීය.

ඉදිකිරීම් ව්‍යාපෘති නොමැතිකම හේතුවෙන් රාජ්‍ය ඉදිකිරීම් කර්මාන්තය දුෂ්කරතාවන්ට මුහුණ දී ඇති බව ද සාමාන්‍යාධිකාරීවරයා අවධාරණය කළේය.