වැලිගම ප්‍රාදේශීය සභාවේ ජාතික ජන බලවේගයේ මන්ත්‍රීවරයකු වන තාරක නානායක්කාරගේ නිවසට වෙඩිතැබීමේ සිද්ධිය සම්බන්ධයෙන් මාතර ප්‍රදේශයේ දී 33 හැවිරිදි සැකකරුවකු අත්අඩංගුවට ගෙන ඇති බව පොලිසිය පවසයි.

ජූලි 16 වැනි දින වැලිගම උඩුකාව ප්‍රදේශයේ වෙඩිතැබීමේ සිද්ධියක් වාර්තා විය.

පොලිසියට අනුව, යතුරුපැදියකින් පැමිණි නාඳුනන තුවක්කුකරුවන් දෙදෙනෙකු අලුයම 4:40 ට පමණ උඩුකාව ප්‍රදේශයේ වැලිගම ප්‍රාදේශීය සභා මන්ත්‍රීවරයකුගේ නිවසට වෙඩිතබා ඇත.

පසුව වෙඩිතැබූ පුද්ගලයන් එම ස්ථානයෙන් පළාගොස් තිබිණි.

පොලිස් මාධ්‍ය ප්‍රකාශක කාර්යාලය පවසා ඇත්තේ, වෙඩිතැබීමෙන් කිසිවෙකුට තුවාල සිදුවී නොමැති බවත් නිවසේ ගේට්ටුවට වෙඩිවැදී ඇති බවත්ය.

පොලිස් මාධ්‍ය අංශයට අනුව, ජාතික ජන බලවේගය නියෝජනය කරන වැලිගම ප්‍රාදේශීය සභා මන්ත්‍රීවරයා මීට පෙර මරණ තර්ජන එල්ල වී ඇති බවට පොලිසියට දැනුම් දී තිබේ.