2007 සහ 2009 අතර සිදු කරන ලද මතභේදාත්මක හෙජින් ගනුදෙනු සම්බන්ධයෙන් ලංකා ඛනිජ තෙල් නීතිගත සංස්ථාව තවමත් නීතිපති දෙපාර්තමේන්තුවෙන් නීතිමය මතයක් බලාපොරොත්තුවෙන් සිටින බව වාර්තා වේ.

ඛනිජ තෙල් නීතිගත සංස්ථාව පිළිබඳ නවතම 2023 විගණන වාර්තාවට අනුව, 2023 දෙසැම්බර් 31 වන විට මෙම හෙජින් ගනුදෙනුවලින් රටට සිදු වූ මුළු මූල්‍ය අලාභය රුපියල් මිලියන 14,028ක් විය.

මෙම ගනුදෙනු සම්බන්ධයෙන් කොමර්ෂල් බැංකුව කොළඹ වාණිජ මහාධිකරණයේ ඛනිජ තෙල් නීතිගත සංස්ථාවට එරෙහිව ඩොලර් මිලියන 8.6ක හිමිකම් පෑමක් ඉල්ලා නඩුවක් ගොනු කර ඇති බව වාර්තාවෙන් හෙළි වී තිබේ.

ඊට ප්‍රතිචාර වශයෙන්, මෙම නඩුවේ මූලික විරෝධතා නියෝගයකට එරෙහිව ඛනිජ තෙල් නීතිගත සංස්ථාව ශ්‍රේෂ්ඨාධිකරණයේ අභියාචනයක් ගොනු කර ඇත.

මෙම අභියාචනය පිළිබඳ ශ්‍රේෂ්ඨාධිකරණයේ තීන්දුව දැනට කල් තබා ඇත.

වාර්තාවට අනුව, මූල්‍ය අලාභයේ පරිමාණය සහ අඛණ්ඩ නීතිමය ක්‍රියාමාර්ග තිබියදීත්, මෙම ගනුදෙනු හරහා සිදු වූ පාඩු පියවා ගැනීමට ගත හැකි පියවර පිළිබඳ නීතිපති දෙපාර්තමේන්තුවෙන් විධිමත් උපදෙස් තවමත් ඛනිජ තෙල් නීතිගත සංස්ථාවට ලැබී නොමැත.

සැළකිව යුතු කරුණක් නම්, 2013 දී නීතිමය ක්‍රියාමාර්ග සම්බන්ධයෙන් ඛනිජ තෙල් නීතිගත සංස්ථාව මුලින්ම නීතිපතිවරයාගේ මතය විමසා තිබුණද, මේ දක්වා විධිමත් ප්‍රතිචාරයක් ලබා දී නොමැති වීමයි.

නඩුව සම්බන්ධයෙන් සංස්ථාවට මෑත කාලීන යාවත්කාලීන කිරීම් හෝ නිල සන්නිවේදනයක් ලැබී නොමැති බව ඛනිජ තෙල් නීතිගත සංස්ථා කළමනාකාර අධ්‍යක්ෂ ආචාර්ය මයුර නෙත්තිකුමාරගේ තහවුරු කළේය.

නඩුව සක්‍රීයව පවතීද නැතහොත් කොමර්ෂල් බැංකුව තවමත් නීතිමය ක්‍රියාමාර්ග ගනිමින් සිටීදැයි කළ විමසීමකට ආචාර්ය නෙත්තිකුමාරගේ පවසා තිබුණේ “නඩුව තවමත් සක්‍රීයද යන්න මට විශ්වාස නැහැ. එය ඒ කාලේ ප්‍රධාන නඩුවක්. නමුත් මෑතකදී ඒ පිළිබඳ කිසිදු සාකච්ඡාවක් හෝ දැනුම්දීමක් සිදුවෙලා නැහැ” යනුවෙනි.

2023 විගණන වාර්තාවේ මෙම කාරණය තවමත් විභාග වෙමින් පවතින බව සඳහන් කර ඇති බැවින්, නීතිපති දෙපාර්තමේන්තුවෙන් හෝ වාණිජ බැංකුවෙන් පැහැදිලි කිරීමක් ලබා ගත හැකි බව ඔහු තවදුරටත් පෙන්වා දුන්නේය.

නඩුව පිළිබඳ යාවත්කාලීන තොරතුරු නොමැතිකම නීතිපති පාරින්ද රණසිංහ පිළිගෙන ඇති අතර එහි වත්මන් තත්ත්වය තහවුරු කිරීම සඳහා ඉදිරි සතිය තුළ වැඩිදුර තොරතුරු ලබා ගත හැකි බව පැවසීය.

ජාතික විගණන කාර්යාලය, එහි වාර්තාවේ, දිගුකාලීන ගැටලුව විසඳීමට ඛනිජ තෙල් නීතිගත සංස්ථාව කඩිනමින් සුදුසු පියවර ගන්නා ලෙසත්, මෙම හෙජින් ගනුදෙනු හරහා සිදු වූ සැළකිව යුතු පාඩු පියවා ගැනීම සඳහා නීතිමය විකල්ප ගවේෂණය කරන ලෙසත් නිර්දේශ කර ඇත.