July 8, 2025
මෙම වසර මුලදී මතභේදාත්මක ලෙස බහාලුම් 323ක් මුදා හැරීම සම්බන්ධයෙන් මුදල් අමාත්යාංශයේ කමිටුව විසින් මෑතකදී කරන ලද සොයාගැනීම් සහ නිර්දේශ සම්බන්ධයෙන් තීරණ ගැනීමට තමන්ට බලයක් නොමැති බව වරාය හා සිවිල් ගුවන් සේවා අමාත්යාංශය ප්රකාශ කළේය.
මුදල් අමාත්යාංශය විසින් පත් කරන ලද පස් දෙනෙකුගෙන් යුත් කමිටුවක් විසින් සකස් කරන ලද වාර්තාව මෑතකදී ජනාධිපති සහ මුදල් අමාත්ය අනුර කුමාර දිසානායක වෙත ඉදිරිපත් කරන ලදී.
වරාය හා සිවිල් ගුවන් සේවා නියෝජ්ය අමාත්ය ජනිත රුවන් කොඩිතුවක්කු පැවසුවේ මෙම කාරණය මුදල් අමාත්යාංශයේ විෂය පථයට අයත් බවයි.
“අවශ්ය තීරණ ගත යුත්තේ මුදල් අමාත්යාංශයයි. අපිට ඊට කිසිදු සම්බන්ධයක් නැහැ” යැයි ඔහු පවසයි.
බහාලුම් නිෂ්කාශනයට අදාළ තීරණ සම්බන්ධයෙන් අමාත්යාංශය යටතේ ඇති ශ්රී ලංකා වරාය අධිකාරිය කාර්යභාරයක් ඉටු නොකරන බව ඔහු පැහැදිලි කළේය.
“අපි නිෂ්කාශන ක්රියාවලිය සඳහා පහසුකම් සපයනවා. බහාලුම් නිෂ්කාශනය කර මුදා හරින්නේ රේගුවයි. රේගුව මුදල් අමාත්යාංශය යටතේ තියෙන්නේ. ශ්රී ලංකා වරාය අධිකාරිය පහසුකම් සපයන්නේ එම ක්රියාවලියට පමණයි.” යනුවෙන් ඔහු පැහැදිලි කළේය.
සිද්ධිය විමර්ශනය කිරීම සඳහා මුදල් අමාත්යාංශය විසින් පස් දෙනෙකුගෙන් යුත් කමිටුවක් පත් කර ඇති අතර, කමිටුවේ වාර්තාව මෑතකදී ජනාධිපති දිසානායක වෙත ඉදිරිපත් කරන ලදී.
කෙසේවෙතත්, තවමත් වාර්තාව නිල වශයෙන් ලැබී නොමැති බව රේගුව තහවුරු කර ඇත.
වාර්තාවට අනුව, සම්මත ක්රියා පටිපාටි උල්ලංඝනය කරමින් විවිධ අවස්ථා 13කදී අධි අවදානම් සහිත බහාලුම් 999ක් පරීක්ෂාවකින් තොරව මුදා හැර තිබේ.
මෙය ජාතික ආරක්ෂාවට, මහජන සෞඛ්යයට සහ රජයේ ආදායමට තර්ජන එල්ල කළ හැකි බවට වාර්තාව අනතුරු අඟවයි.
නියමිත ක්රියාවලිය අනුගමනය නොකර මුදා හැරීම සඳහා අනුමත කිරීම සම්බන්ධයෙන් රේගු අධ්යක්ෂ ජනරාල්වරයා විවේචනයට ලක්වන අතර රේගු ආඥා පනත යටතේ ලබා දී ඇති බලතල ඉක්මවා ගොස් ඇති බව සටහන් කරයි.
එහි නිර්දේශ අතර, වත්මන් මුදා හැරීමේ යාන්ත්රණය වහාම නතර කිරීම, හානිය තක්සේරු කිරීම සඳහා සම්පූර්ණ පශ්චාත් විගණනයක් සහ මතභේදාත්මක පද්ධතිය හරහා නිෂ්කාශනය කරන ලද සියලුම බහාලුම්වල වෝහාරික විගණනයක් සිදුකරන ලෙස වාර්තාව ඉල්ලා සිටී.
