ජූලි 01 වනදා සිට ක්‍රියාත්මක වන පරිදි බස් ගාස්තුව 2.5% කින් අඩු කිරීමට ජාතික ගමනාගමන කොමිෂන් සභාව අනුමැතිය ලබා දී ඇත.

ප්‍රවාහන අමාත්‍යාංශය සහ බස් සංගම් නියෝජිතයන් අතර අද පැවති සාකච්ඡාවකින් අනතුරුව බස් ගාස්තු සියයට 2කින් අඩු කිරීමට පියවර ගන්නා බවට රජය බස් සංගම් වෙත දැනුම් දී ඇති බව මීට පෙර වාර්තා විය.

ජුලි 1 වැනිදා සිට ක්‍රියාත්මක වීමට නියමිත වාර්ෂික බස් ගාස්තු සංශෝධනය පිළිබඳව සාකච්ඡා කිරීම සඳහා මෙම රැස්වීම කැඳවා ඇති අතර, එම රැස්වීමේදී ප්‍රවාහන බලධාරීන් යෝජිත ගාස්තු අඩු කිරීම නිවේදනය කර තිබේ.

කෙසේ වෙතත් බස් සංගම් එම යෝජනාවට සිය විරෝධය ප්‍රකාශ කර තිබිණි.

යෝජිත සංශෝධනයට අනුව පළමු සහ දෙවන අදියර ගාස්තු නොවෙනස්ව පවතින අතර, එම ආරම්භක අදියරෙන් ඔබ්බට පවතින ගාස්තු ව්‍යුහයට පමණක් ගාස්තු අඩු කිරීම අදාළ වේ.

ගාස්තු සංශෝධනය සම්බන්ධයෙන් අදහස් දැක්වූ ලංකා පෞද්ගලික බස් හිමියන්ගේ සංගමයේ සභාපති ගැමුණු විජේරත්න කියා සිටියේ එහි වාසිය මගීන්ට හෝ බස් සංගම්වලට නොලැබෙන බවයි.

ප්‍රතිශත අනුව බස් ගාස්තුව රුපියලකින් හෝ දෙකකින් අඩු කරන බවද ඔහු පැවසීය.