June 14, 2025
අනුරාධපුර මධ්‍ය මහා විද්‍යාලයේ පන්ති කාමරවල පවතින තදබදය අධ්‍යාපනයේ ගුණාත්මක භාවයට අහිතකර ලෙස බලපාන බව සඳහන් කරමින් එම ගැටලුව විසඳීම සඳහා පන්ති කාමර සංඛ්‍යාව වැඩි කරන ලෙස ශ්‍රේෂ්ඨාධිකරණය ඊයේ අධ්‍යාපන අමාත්‍යාංශයට නියෝග කළේය.
එම ගැටලුව අභියෝගයට ලක් කරමින් ආචාර්ය හර්ෂ පතිරගොඩ විසින් ගොනු කරන ලද මූලික අයිතිවාසිකම් අයදුම්පතක් සළකා බැලීමෙන් මෙම නියෝගය නිකුත් කරන ලදී.
මීට පෙර අවස්ථාවකදී නීතිපතිවරයා අධිකරණයට දැනුම් දුන්නේ පාසලේ 08 ශ්‍රේණියට අමතර පන්තියක් එකතු කිරීමෙන් විසඳුමක් සොයාගත හැකි බවත්, එමඟින් පන්තියක සිසුන් සංඛ්‍යාව අධ්‍යාපන අමාත්‍යාංශය විසින් පනවා ඇති සීමාවට වඩා අඩු කළ හැකි බවත්ය.
එම අවස්ථාවේදී, පෙත්සම්කරුගේ නීතිඥවරයා ඉදිරිපත් කළේ එවැනි පියවරක් ක්‍රියාත්මක කළහොත් තමන් සෑහීමකට පත්වන බවත්, තීරණය ක්‍රියාත්මක වූ පසු අයදුම්පත ඉල්ලා අස්කර ගන්නා බවත්ය.
ඉහත කරුණු සැළකිල්ලට ගනිමින්, පෙත්සම්කරු අයදුම්පත ඉල්ලා අස්කර ගැනීමට අධිකරණයේ අවසරය ඉල්ලා සිටියේය.
ඒ අනුව, මෙම නඩුව අවසන් කිරීමට විනිසුරු ජනක් ද සිල්වා නියෝග කළේය.
පෙත්සම්කරු වෙනුවෙන් තුෂාරි ජයවර්ධනපුරගේ උපදෙස් මත නීතිඥ සේනියා ප්‍රනාන්දු පෙනී සිටියාය.
නියෝජ්‍ය සොලිසිටර් ජනරාල් ෆස්ලි රාසික් අධ්‍යාපන අමාත්‍යාංශය වෙනුවෙන් පෙනී සිටියේය.
