කොළඹ තුරඟ තරඟ පිටියේ පැවති AFC ආසියානු කුසලාන සුදුසුකම් ලැබීමේ තරඟයේදී චීන තායිපේ කණ්ඩායම ගෝල 3-1ක් ලෙස පරාජය කිරීමට ශ්‍රී ලංකා පාපන්දු කණ්ඩායම ඊයේ සමත්විය.

මෙය ශ්‍රී ලංකා කණ්ඩායම මෑත කාලයේ දී දැක්වූ හොඳම දස්කම්වලින් එකකි.

ශ්‍රී ලංකාව තරඟය පුරාම වඩා හොඳ කණ්ඩායමක් ලෙස ප්‍රතිවාදීන්ට ගෝල පහර 15ක් උත්සාහ කළ අතර ප්‍රතිවාදීන්ගෙන් එල්ල වූයේ ගෝල පහර 4ක් පමණි.

ඒ අනුව තරඟයේ වැඩි ඉඩක් ලබා ගැනීමට ශ්‍රී ලංකා කණ්ඩායමට හැකිවිය.

පසුගිය සතියේ තායිලන්තයේ බැංකොක්හි පැවති FIFA මිත්‍රශීලී අන්තර්ජාතික තරඟයකදී බෲනායි දරුස්සලාම් කණ්ඩායමට එරෙහිව 1-0ක ජයක් ලබා ගැනීමෙන් පසු, ශ්‍රී ලංකා කණ්ඩායම ආත්ම විශ්වාසයකින් යුතුව මෙම තරගය ආරම්භ කළේය.

පළමු අර්ධයේ දී දෙපිළම ලකුණු ලබා නොගත් අතර 48 වැනි මිනිත්තුවේදී ශ්‍රී ලංකාව සිය පළමු ගෝලය වාර්තා කිරීමට සමත් විය.

මිනිත්තු තුනකට පසු ශ්‍රී ලංකාව තම පෙරමුණ දෙගුණ කළේ දෙවැනි ගෝලය ද වාර්තා කරමිනි.

තරගයේ 69 වැනි මිනිත්තුවේදී ආදේශක ක්‍රීඩක හුවාං වෙයි-චියන් එල්ල කළ නිදහස් පහරකින් චීන තායිපේ කණ්ඩායමේ එකම ගෝලය සටහන් විය.

මෙම ජයග්‍රහණයත් සමඟ ශ්‍රී ලංකාව ‘ඩී’ කාණ්ඩයේ පෙරමුණේ සිටින තායිලන්තය සහ ටර්ක්මෙනිස්තානය සමඟ ලකුණු තුනක් බැගින් ලබා ගත්තේය.

මෙය අන්තර්ජාතික තරඟයකදී චීන තායිපේට එරෙහිව ශ්‍රී ලංකාව ලැබූ පළමු ජයග්‍රහණය ද විය.