මෙම සතිය තුළ යෝජිත විදුලි ගාස්තු සංශෝධනය පිළිබඳ අවසන් තීරණය ප්‍රකාශයට පත්කරන බව මහජන උපයෝගිතා කොමිෂන් සභාව පවසයි.

මහජන අදහස් විමසීමේ ක්‍රියාවලියේදී ලැබුණු ලිඛිත සහ වාචික කරුණු 500කට අධික සංඛ්‍යාවක් සමාලෝචනය කිරීමෙන් අනතුරුව ඒ පිළිබඳ අවසන් තීරණයකට එළඹෙන බව ද එම කොමිසම පෙන්වාදෙයි.

මහජන උපයෝගිතා කොමිෂන් සභාවේ සන්නිවේදන අධ්‍යක්ෂ ජයනාත් හේරත් උපුටා දක්වමින් The Daily Morning පුවත්පත වාර්තා කළේ, උපදේශන අතරතුර ලිඛිත හා වාචික ඉදිරිපත් කිරීම් 500කට වැඩි ප්‍රමාණයක් ලැබී ඇති බව සහ ඒවා සමාලෝචනය කිරීමේ ක්‍රියාවලිය පසුගිය සතියේදී අවසන් කළ බවයි.

මේ වනවිට ඊට අදාළ නිර්දේශ සකස් කරමින් පවතින බවත්, එම නිර්දේශ කොමිසමට ඉදිරිපත් කිරීමට නියමිතව ඇති බවත් ඔහු පවසා තිබේ.

ඒ අනුව ඒ සම්බන්ධයෙන් වන අවසන් තීරණය මෙම සතියේදී ප්‍රකාශයට පත්කිරීමට නියමිත බව ජයනාත් හේරත් තහවුරු කර ඇත.

ලංකා විදුලිබල මණ්ඩලය මෙම මාසයේ සිට දෙසැම්බර් දක්වා කාලය සඳහා 18.3% මිල වැඩි කිරීමක් ඉල්ලා ඇති අතර, එය පෙර ණය ගැනීම් ද ඇතුළුව, ඉහළ යන මෙහෙයුම් වියදම් කළමනාකරණය කිරීමට සහ ණය ගෙවීම සඳහා අත්‍යවශ්‍ය බව පවසා තිබේ.

විදුලිබල මණ්ඩලයට අනුව යෝජිත වැඩිවීමත් සමඟ වුවද, සාමාන්‍ය අනුපාත තවමත් වසර ආරම්භයේ තිබූ මට්ටමට වඩා 5.4%ක් පමණ අඩුවෙන් පවතී.

ජනවාරි මාසයේදී සිදු කළ 20% ක අඩුවීමත් සමග එම අගයේ සාමාන්‍ය අනුපාතය කිලෝවොට් පැයකට රුපියල් 24ක අගයක් ගනී.

ලංකා විදුලිබල මණ්ඩලයේ ප්‍රකාශක ඉංජිනේරු ධම්මික විමලරත්න පසුගියදා ප්‍රකාශ කළේ, ඉන්ධන මිල, අමතර කොටස් සහ ජනන පිරිවැය ඉහළ ගියද 2014 සිට 2022 දක්වා ඒ සඳහා උචිත පරිදි මිල සකස් නොකළ බවයි.

එම කාලය තුළ මණ්ඩලය ණය ගනිමින් සහ ගෙවීම් කල්දමමින් මෙහෙයුම් කටයුතු සිදුකළ බවත්, එම තත්වය මේ වන විට විදුලිබල මණ්ඩලය මුහුණ පා සිටින මූල්‍ය අර්බුදයට හේතු වී ඇති බවත් ඔහු පැවැසීය.