April 30, 2025
විභාග දෙපාර්තමේන්තු පරිශ්‍රය තුළ ඉදිකරන ලද නව බහුකාර්ය ගොඩනැගිල්ල අග්‍රාමාත්‍ය, අධ්‍යාපන අමාත්‍ය ආචාර්ය හරිනි අමරසූරිය විසින් අද නිල වශයෙන් විවෘත කළාය.
විභාග දෙපාර්තමේන්තුවේ මෙහෙයුම් ධාරිතාව ඉහළ නැංවීමේ අරමුණින් ඉදිකර ඇති මෙම නව ගොඩනැගිල්ල මහල් 06 කින් සමන්විත වන අතර ඒ සඳහා වැය වී ඇති ඇස්තමේන්තු ගත පිරිවැය රුපියල් මිලියන 478ක් බව පැවසෙයි.
කාර්යක්ෂමතා කඩඉම් සහ රාජ්‍ය සේවා විභාග සඳහා සුදුසු නවීන විභාග ශාලා, උසස් ශ්‍රව්‍ය දෘෂ්‍ය පහසුකම් සහිත ආසන 175 කින් යුත් අංග සම්පූර්ණ ශ්‍රවණාගාරයක් සහ විභාග සඳහා මුහුණදෙන විශේෂ අවශ්‍යතා ඇති දරුවන්ට නවාතැන් ගතහැකි ශබ්ද පාලන බහුකාර්ය පටිගත කිරීමේ මැදිරියක් එයට ඇතුළත් වේ.
ගොඩනැගිල්ලේ අන්තර්ගත අනෙකුත් ප්‍රධාන අංග අතර සඳහා නේවාසික නවාතැන්, මාර්ගගත විභාග සඳහා අන්තර්ජාල පහසුකම් සහිත කාමර, රහස්‍ය විභාග ක්‍රියා පටිපාටි සඳහා වෙන්වූ අවකාශයන්, පොදු සන්නිවේදන ජාලයක් සහ අමතර ආරක්ෂාව සඳහා CCTV නිරීක්ෂණ පද්ධතියක් ඇතුළත් වේ.
ගොඩනැගිල්ල විවෘත කිරීමේ අවස්ථාවට එක්වෙමින් අග්‍රාමාත්‍ය හරිනි අමරසූරිය පැවසුවේ, විභාග දෙපාර්තමේන්තුවේ තීරණාත්මක කාර්යයන් සඳහා සහාය වීම වෙනුවෙන් විශ්‍රාම ගැනීමෙන් පසුව ද යළි රාජකාරි ආරම්භ කළ විභාග කොමසාරිස් ජනරාල් අමිත් ජයසුන්දරට ස්තූතිය පළ කරන බවයි.
ඉකුත් දා නිකුත් වූ උසස් පෙළ ප්‍රතිඵල නිකුත් කිරීම දෙපාර්තමේන්තුවේ වෘත්තීයභාවය සහ කැපවීම අගය කරන බව ද ඇය සඳහන් කළාය.
ඉදිරි අධ්‍යාපන ප්‍රතිසංස්කරණ සඳහා විශේෂයෙන්ම ශ්‍රී ලංකාවේ තක්සේරු පද්ධතිවල විශ්වසනීයත්වය සහ නවීකරණය සඳහා මෙම ගොඩනැගිලි පහසුකම් තීරණාත්මක කාර්යභාරයක් ඉටුකරනු ඇතැයි ද ඇය පැවසුවාය.
