අද (12) අලුයම ශ්‍රී ලංකාවේ බටහිර වෙරළට ඔබ්බෙන් වූ විශේෂ මෙහෙයුමකදී අත්අඩංගුවට ගත් බහුදින ධීවර යාත්‍රාවකින් හෙරොයින් සහ ස්ඵටික මෙතම්ෆෙටමින් (ICE) කිලෝග්‍රෑම් 100 කට අධික ප්‍රමාණයක් ශ්‍රී ලංකා නාවික හමුදාව විසින් අත්අඩංගුවට ගෙන තිබේ.

බුද්ධි තොරතුරු මත ක්‍රියාත්මක වූ නාවික නිලධාරීන් කණ්ඩායමක් සමුද්‍ර මෙහෙයුමක් දියත් කර ශ්‍රී ලංකාවේ බටහිර මුහුදු සීමාව තුළ යාත්‍රාව අත්අඩංගුවට ගෙන ඇත.

අත්අඩංගුවට ගත් යාත්‍රාව අද දහවල් වන විට දික්ඕවිට ධීවර වරායට ගෙන එන ලද අතර, එහිදී යාත්‍රාව තුළ සඟවා තිබූ හෙරොයින් සහ අයිස් කිලෝග්‍රෑම් 100 කට අධික ප්‍රමාණයක් සොයා ගන්නා ලදී.

දෙවුන්දර ප්‍රදේශයේ පදිංචිකරුවන් වන යාත්‍රාවේ සිටි ධීවරයන් හයදෙනෙකු අත්අඩංගුවට ගෙන තිබේ.

මෙම කණ්ඩායම ධීවර කටයුතු සඳහා ත්‍රිකුණාමලය ප්‍රදේශයෙන් පිටත්ව ගොස් ඇති බව විමර්ශනවලින් හෙළිවී තිබේ.

නාවික හමුදාවට අනුව, අත්අඩංගුවට ගත් මත්ද්‍රව්‍යවල ඇස්තමේන්තුගත වීදි වටිනාකම රුපියල් බිලියන 2 ඉක්මවයි.

සැකකරුවන් සහ මත්ද්‍රව්‍ය තොගය වැඩිදුර පරීක්ෂණ සඳහා පොලිස් මත්ද්‍රව්‍ය නාශක කාර්යාංශයට භාර දී ඇත.