ගංවතුර පැවති ප්‍රදේශවල මී උණ ව්‍යාප්තවීමේ අවදානමක් මතුව ඇතැයි සෞඛ්‍ය අංශ අනතුරු අඟවයි.

වසංගත රෝග විද්‍යා ඒකකය සඳහන් කළේ, වැඩි අවදානම් සහිත ප්‍රදේශ ලෙස රත්නපුර, ගාල්ල, කළුතර, කුරුණෑගල, කෑගල්ල සහ මාතර දිස්ත්‍රික්ක හඳුනා ගෙන ඇති බවයි.

වසරේ ගත වූ කාලය තුළ මෙරටින් මී උණ රෝගීන් 10,000ක් පමණ වාර්තා වී තිබේ.

මී උණ හේතුවෙන් වාර්ෂිකව පුද්ගලයන් 120 ත් 200 ත් අතර සංඛ්‍යාවක් මියයන බව සෞඛ්‍ය අමාත්‍යාංශය පවසයි.

මීයන්ගේ මුත්‍රා ජලයට එක්වී, ශරීරයේ පවතින තුවාල ඔස්සේ විෂබීජ ශරීරගත වී, මී උණ වැළදිය හැකි බව සෞඛ්‍ය අංශ පෙන්වාදෙයි.

ඇස් රතුවීම, උණ, මුත්‍රා පිටවන ප්‍රමාණය අඩුවීම, අධික හිසරදය හා මස්පිඩු වේදනාව, මී උණ රෝගයේ ලක්ෂණ වේ.

එම රෝග ලක්ෂණ පවතින්නේ නම් කඩිනමින් රෝහල්ගත වන්නැයි සෞඛ්‍ය අමාත්‍යාංශය ජනතාවට දැනුම්දෙයි.