ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී එස්.එම්. චන්ද්‍රසේන ඉදිරි ජනාධිපතිවරණයේදී ජනාධිපති රනිල් වික්‍රමසිංහට සහාය පළ කරන බව ප්‍රකාශ කර තිබේ.

ශ්‍රී ලංකා පොදුජන පෙරමුණේ අනුරාධපුර දිස්ත්‍රික් කමිටුව ද ජනාධිපතිවරයාට සහාය දැක්වීමට තීරණය කර ඇති බව පාර්ලිමේන්තු මන්ත්‍රී චන්ද්‍රසේන වැඩිදුරටත් පැවසීය.

අද පැවති ශ්‍රී ලංකා පොදුජන පෙරමුණේ අනුරාධපුර දිස්ත්‍රික් කාරක සභා රැස්වීමේදී මන්ත්‍රීවරයා මේ බව ප්‍රකාශ කළේය.

ශ්‍රී ලංකා පොදුජන පෙරමුණ තමන්ගේම අපේක්ෂකයකු ඉදිරිපත් කිරීමට තීරණය කර ඇති අතර ජනාධිපති රනිල් වික්‍රමසිංහ ස්වාධීන අපේක්ෂකයකු ලෙස තරඟ කිරීමට තීරණය කර ඇති අවස්ථාවක පාර්ලිමේන්තු මන්ත්‍රී එස්.එම්. චන්ද්‍රසේන මෙම නිවේදනය නිකුත් කර ඇත.

ජනාධිපතිවරණය 2024 සැප්තැම්බර් 21 දින පැවැත්වීමට නියමිත අතර නාමයෝජනා භාර ගැනීම අගෝස්තු 15 වැනි දින සිදු කෙරේ.