නාගරික සංවර්ධන හා නිවාස අමාත්‍යාංශය සැහැල්ලු දුම්රිය සංක්‍රමණ ව්‍යාපෘතිය සඳහා ඉඩම් අත්පත් කර ගැනීම් නැවත ආරම්භ කිරීමේ හැකියාව සලකා බලමින් සිටින අතර, ජපානයේ අරමුදල් සමඟ ව්‍යාපෘතිය ආරම්භ කිරීමට බොහෝදුරට ඉඩ ඇති බව ද ජනමාධ්‍ය වාර්තා කරයි.

ජනමාධ්‍ය වෙත අදහස් දක්වමින් නාගරික සංවර්ධන හා නිවාස අමාත්‍යාංශයේ ලේකම් ඩබ්ලිව්. සත්‍යානන්ද පවසා ඇත්තේ සැහැල්ලු දුම්රිය සංක්‍රමණ ව්‍යාපෘතිය ඉදිකිරීම සඳහා ඉඩම් අත්පත් කරගැනීම් නැවත ආරම්භ කිරීමේ හැකියාව පිළිබඳව අමාත්‍යාංශය මේ වන විට සළකා බලමින් සිටින බවයි.

“මෙම ව්‍යාපෘතිය නතර කිරීමට පෙර අත්පත් කර ගැනීම් ආරම්භ කර තිබිණි. ඒවා නවත්වපු තැනින් ආයෙත් පටන් ගන්න තමයි බලන්නේ. ව්‍යාපෘතිය සඳහා දේශීය අරමුදල්වලින් කුමක් කළ හැකිද යන්නත් අපි සොයාබලනවා,” සත්‍යානන්ද සදහන් කර ඇත.

ඔහුට අනුව සැහැල්ලු දුම්රිය සංක්‍රමණ ව්‍යාපෘතිය සඳහා ජපන් අරමුදල් සමඟ ඉදිරියට යෑමට රජය ප්‍රතිපත්තිමය තීරණයක් ගෙන තිබිණි.

“කෙසේවෙතත්, ණය ප්‍රතිව්‍යුහගතකරණය කිරීම මේ වන විට අවසන් කර ඇති නමුත් අරමුදල් තවමත් තහවුරු කර නොමැත. ජයිකා ආයතනයේ නිලධාරීන් සමඟ නැවත සාකච්ඡා කිරීමට අපි බලාපොරොත්තු වෙනවා,” ඔහු පවසයි.

2022 දී ශ්‍රී ලංකාව සිය විදේශ ණය පැහැරහැරීමත් සමඟ, ජපානයෙන් ලැබෙන අනෙකුත් සියලුම අරමුදල් ද නතර විය. කෙසේවෙතත්, පසුගිය සතියේ ශ්‍රී ලංකාවේ ද්විපාර්ශ්වික ණය දෙන්නන් සමඟ ණය ප්‍රතිව්‍යුහගතකරණය කිරීමේ ගිවිසුම් අවසන් කිරීම විදේශ අරමුදල් සඳහා යළිත් මංපෙත් විවර කළේය.

ජපානයේ සංචාරයක යෙදීසිටි විදේශ ඇමැති අලි සබ්රි සිය X ගිණුමේ සටහනක් තබමින් පැවසුවේ අත්හිටවූ ව්‍යාපෘති වහාම නැවත ආරම්භ කිරීම සම්බන්ධ ගැටළු ජපාන අන්තර්ජාතික සහයෝගීතා ඒජන්සියේ ජ්‍යෙෂ්ඨ කළමනාකාරීත්වය සමඟ සාකච්ඡා කළ බවයි.

හිටපු රජය විසින් ව්‍යාපෘතිය අවලංගු කරන විට, ඔවුන් දැනටමත් අවසන් කර ඇති වැඩ සඳහා ව්‍යාපෘති උපදේශකයන්ට හිඟ ගෙවීමක් ලබා දී නොමැති බව වාර්තා පෙන්වා දුන්නේය.

“අතරමග ඇනහිට ඇති ගෙවීම් පියවීමට සුදානම් වන අතර කැබිනට් අනුමැතිය සහ භාණ්ඩාගාර/විදේශ සම්පත් දෙපාර්තමේන්තු අනුමැතිය බලාපොරොත්තුවෙන් සිටී,” සත්‍යානන්ද පවසයි.

කෙසේවෙතත්, ගෙවීමේ නිශ්චිත මුදල තහවුරු කිරීමට ලේකම්වරයාට නොහැකි විය.

පසුගිය වාර්තා පෙන්වා දෙන්නේ හිඟ ගෙවීම රු. බිලියන 5 ක් බවයි.

මෙම ව්‍යාපෘතිය 2017 වසරේ එවකට මහානගර හා බස්නාහිර සංවර්ධන අමාත්‍යාංශය යටතේ හිටපු ජනාධිපති මෛත්‍රීපාල සිරිසේන මහතා ප්‍රමුඛ රජය විසින් ආරම්භ කරන ලද අතර කොළඹට සැහැල්ලු දුම්රිය ප්‍රවාහන පද්ධතියක් ඉදිකිරීමට සැලසුම් කරන ලදී.

2023 මැයි මාසයේදී ටෝකියෝවේ සංචාරයක නිරත වූ ජනාධිපති රනිල් වික්‍රමසිංහ ව්‍යාපෘතිය ඒකපාර්ශ්විකව අවලංගු කිරීම සම්බන්ධයෙන් ජපාන රජයෙන් සමාව අයැද සිටියේය. (The Morning)