ජනතා විමුක්ති පෙරමුණේ සාමාජිකයකු පොළොන්නරුවේ පැවති රැස්වීමකදී සමගි ජන බලවේගයට එක් වූ බවට කරන ප්‍රකාශයන් ජාතික ජන බලවේගය ප්‍රතික්ෂේප කර තිබේ.

එම පුද්ගලයා ජනතා විමුක්ති පෙරමුණේ සාමාජිකයකු නොව ශ්‍රී ලංකා නිදහස් පාක්ෂිකයකු බව ජාතික ජන බලවේගයේ නායක අනුර කුමාර දිසානායක පවසයි.

මන්නාරම ප්‍රදේශයේ පැවති රැස්වීමකට එක්වෙමින් දිසානායක කියාසිටියේ පොළොන්නරුව මහ නගර සභාවේ බැඳිවැව කොට්ඨාසයට තරඟ කිරීම සඳහා පළාත් පාලන මැතිවරණය සඳහා නාමයෝජනා භාරදුන් හිටිහාමිලාගේ සමන් කුමාර යන අය ශ්‍රී ලංකා නිදහස් පක්ෂ අපේක්ෂකයකු බවයි.

“ඔයාලා දකින්න ඇති අද පොළොන්නරුවේ සමගි ජන බලවේගයේ රැලියකදී ජනතා විමුක්ති පෙරමුණේ කෙනෙක් සමගි ජන බලවේගයට ගියා කියනවා. මේක අද රූපවාහිනියේ ලොකු ප්‍රවෘත්තියක් මවනවා. සමගි ජන බලවේගයේ නායකයෝ හැමෝම එයාව සතුටින් වැළඳ ගත්තා. මම දන්නවා එයා කවුද කියලා. එයා පොළොන්නරුව මහ නගර සභාවේ බැඳිවැව කොට්ඨාශයට ශ්‍රී ලංකා නිදහස් පක්ෂයෙන් තරග කිරීමට නාමයෝජනා භාරදුන් හිටිහාමිලගේ සමන් කුමාර. ජනතා විමුක්ති පෙරමුණේ මන්ත්‍රීවරයකු බව කියන්නේ කෙසේ හෝ ජනතාව අන්දවන්න.” යනුවෙන් ඔහු ප්‍රකාශ කර තිබේ.